Á oyggjaleikunum í Jersey fyrr í summar gjørdist tað greitt, at tað manglaði ein vertstjóð til oyggjaleikirnar í 2019. Á sama hátt sum, at Føroyar mátti taka sína vertsumsókn aftur, tí at tiltikna 12. ítróttargreinin vantaði, so mátti Menorca, ið annars var blivið útnevnt til vertstjóð, bera seg undan. Orsøkin var, at nýggj politisk stjórn er komin til á Menorca. Hendan stjórnin raðfestir ítrótt lægri enn undanfarna stjórnin, og tí ber ikki til hjá Menorca at hýsa oyggjaleikunum í 2019.
Men nú er líkt til, at vertstjóðin er funnin. Bretska hálvoyggin, Gibraltar, hevur sent umsókn til almennu oyggjaleikanevndina um at hýsa leikunum. Hendan umsóknin verður helst gingin á møti, tí at sum nú er eru ikki aðrir umsøkjarar til leikirnar.
Um Gibraltar kann sigast, at bretska hálvoyggin í syðra parti av Spania er 6,8 ferkilometrar til støddar. Til samanbering er Hestur 6,1 ferkilometrar til støddar.
Harafturat var Gibraltar vertur fyri oyggjaleikunum í 1995.
