Tað endaði 6-2 til KÍ, tá ið FC Suðuroy í dag hevði vitjan av KÍ. Klaksvíkingar høvdu eina rúgvu av møguleikum at skora fleiri mál, men teir vóru ikki so neyvir, og so endaði tað við, at FC Suðuroy fram ímóti dystarenda skoraði tvey mál. Tá hevði KÍ skift fýra av føstu monnunum út.
Hetta er fyrsta ferðin síðani 22. juni, at mál eru farin ígjøgnum í heimligu kappingini ímóti KÍ. Tað var í Klaksvík, tá ið tað í Klaksvík endaði við 2-1 sigri ímóti B36. Síðani tá og fram til í dag hevur KÍ spælt fimm landskappingardystir við málmuninum 15-0.
Í dag sá tað eisini út til, at einki mál fór at fara ígjøgnum, tí tá ið Páll A. Klettskarð skoraði í 89. og 90. minutti var støðan 5-0.
Men so var tað, at Fríði Holm minkaði um munin til 5-1 eftir uppspæl frá innskifta Olivur Renéson Thomsen. KÍ málverjin Sebastian Linnet John bað viðspælararnar halda sær til góða, tá ið hann við nærra stólpan hevði mist bóltin í málið.
Í tíðini, sum dómarin legði aftrat, økti innskifti Claes Philip Kronberg um munin til 6-1, og so var tað, at Alexander Holm Kilgour skoraði flott mál, tá ið hann eitt sindur úr vinstru sendi bóltin í handara síðunetið. Aftur var tað Olivur Renéson Thomsen, sum átti fínu fríspælingina. Hetta var fyrsta ferðin yvirhøvur, at Alexander Holm Kilgour var málskjútti í bestu deildini. FaroeSoccer veit at siga, at hetta var 17. ferðin, at 21 ára gamli miðvallarin spældi í bestu deildini, og hetta var fyrsta ferðin yvirhøvur, at hann var á vøllinum alla tíðina.
Um tvær vikur fær FC Suðuroy vitjan av 07 Vestur í lyklauppgerð í stríðnum fyri at sleppa undan niðurflyting, meðan KÍ fær vitjan av Víkingi.
FC Suðuroy – KÍ 2-6 (0-2)
0-1: Árni Frederiksberg
0-2: Deni Pavlovic
0-3: Filip Brattbakk
0-4: Páll A. Klettskarð
0-5: Páll A. Klettskarð
1-5: Fríði Holm
1-6: Claes Philip Kronberg
2-6: Alexander Holm Kilgour
Dómari: Áki Leitisstein Hansen
FC Suðuroy: Rasmus Olsen – Hunter Bell, Jimmy Abdul, Bjartmar Holm, Dánjal Godtfred, Owusu Emmanuel Andorful – Pætur Augustinussen, Salmundur Bech, John Villi Wøldike Leo, Alexander Holm Kilgour, Jákup Tawfik Joensen – Fríði Holm
KÍ: Sebastian Linnet John – Jóannes Kalsø Danielsen, Odmar Færø, Gaston Nicolas Tellechea, Daniel Johansen – Árni Frederiksberg, Dani Pavlovic, Jákup B. Andreasen, Filip Brattbrakk – Mads Bo Mikkelsen, Páll A. Klettskarð
