Fyrst í komandi mánaði skal U19-manslandsliðið til Portugal at kappast í EM-undankappingini, har liðið er komið í bólk saman við Portugal, Ungarn og San Marino.
Fríggjadagin 4. november spæla Portugal og Føroyar, sunnudagin 6. november Ungarn og Føroyar og mikudagin 9. november Føroyar og San Marino. Allir dystirnir verða spældir klokkan 15.
Landsliðsvenjararnir, Abraham Løkin og Eli Hentze, hava nú tikið út 18 spælarar, sum skulu manna liðið til hesar tríggjar dystirnar, og sum skulu møta til nakrar venjingar eftir lokna landskapping.
Úttiknu spælararnir eru Bogi R Petersen, Tróndur Jensen og Magnus Egilson úr HB, Eirik Magnussarson, Rógvi Joensen, Ragnar Tausen úr TB, Ari Ellingsgaard og Hallgrím Gregersen úr ÍF, Beinir Ellefsen úr AB, Jákup Højgaard úr B36, Marcus Klementsen úr B71, Allan Hansen úr EB/Streymi, Brandur Suðuroy úr FC Suðuroy, Sonni Ragnar Nattestad úr MB, Arni Gregersen úr NSÍ, Heðin Hansen úr Víkingur, René Joensen úr Brøndby og Ári Danielsen úr Silkeborg.
Føroyska ferðalagið fer úr Føroyum mikudagin 2. november og kemur heimaftur 10. november.
