Tvey føroyingalið vunnu og tvey taptu

Tað gekk ógvuliga ymiskt hjá føroyingaliðunum í næstbestu donsku hondbóltsdeildini í dag.

HØJ við Róa Berg Hansen vitjaðu TMS Tønder við Teis Horn Rasmussen á liðnum.

HØJ vann stórsigur 33-22. Í steðginum var HØJ á odda 15-8. Rói Berg Hansen skoraði trý mál fyri HØJ. Teis Horn Rasmussen skoraði eitt mál fyri TMS Tønder.

Brandur Halgirsson og liðfelagarnir í Ajax tóku móti Skovbakken í Keypmannahavn. Tað eydnaðist Brandi og liðfeløgunum at vinna 34-29 á liðnum úr Århus. Í steðginum var Ajax á odda 19-15. Brandur Halgirsson skoraði eitt mál fyri Ajax í dag.

Pætur Mikkjalsson og Tróndur Mikkelsen og liðfelagarnir í SUS Nyborg tóku móti Vendsyssel í dag. Tað gekk væl í fyrra hálvleiki hjá heimaliðnum, ið var á odda 13-11 í steðginum, men í seinna hálvleiki koppaði dysturin til Vendsyssel, ið vann 26-24 sigur á SUS Nyborg. Pætur og Tróndur skutu hvør síni tvey mál fyri SUS Nyborg í dag.

Í morgin klokkan 14 spæla Rókur Akralíð og liðfelagarnir í HEI Skæring móti Otterup á útivølli. 

Ajax og HØJ eru enn væl við í stríðnum um triðja plássið, ið gevur rætt til at spæla upp- og niðurflytingardystir móti einum liði úr bestu hondbóltsdeildini.