Konsertin við donsku TV-2 er júst endað eftir hálvumøðrum tíma við donskum poptónleiki.
Tey ungu fingu sítt í gjár, tá írski Ronan Keating framførdi. Í kvøld var túrurin komin til tey tilkomnu, sum fingu valuta fyri pengarnar, tá TV-2 sang eina rúgvu av sínum kendastu sangum.
Við 31 árum á baki, 20 innspælingum, 250 løgum og 2,5 milliónir seldum fløgum eru TV-2 ikki hvørjir sum helst.
Vágsbøur var so at siga fullur, hóast enn fleiri vóru til konsertina við Ronan Keating í gjár. Hóast tey flestu ungu ikki vóru fødd, tá TV-2 byrjaðu í 1981, so var áhoyrarafjøldin væl blandað við fólki í øllum aldrum. Men sjálvsagt vóru tað tó tey tilkomnu, sum hoyrdust harðast syngja við til teir mongu sangirnar. Uttan til 'Første kærester på månen', tí tá var nokk eingin tigandi sangfuglur á Vágsbøi, og rungaði sangurin um allan býin.
Seinni í kvøld kunnu bólkar sum Páll Finnur Páll, Ólavur and his Dirty Rag Rags og Kristina Bærentsen upplivast á Summarfestivalinum.
