Víkingur spælir í kvøld seinna dystin í fyrsta undanumfarinum av Champions League kappingini, tá teir spæla í Kosovo móti Trepca 89.
Víkingur hevur undan dystinum betri kort á hondini enn heimaliðið, tí Víkingur vann í fyrru uppgerðini 2-1 heima í Føroyum.
Tá var talan um uppibornan sigur til Víking, tí hóast mótstøðuliðið hevði bóltin meira enn Víkingur í tí dystinum, gjørdist tað ongantíð serliga vandamikið tá Trepca 89 var í álopsstøðu. Tí skuldi Víkingur havt ein rímiliga góðan møguleika fyri at vunnið seg víðari í kvøld.
Men veddingarfyritøkurnar trúgva ikki nógv uppá Víking í kvøld. So mikið lítið, at ein sigur til Víking gevur heili sjey ferðir pengarnar aftur á síðuni hjá DanskeSpil.
Sambært veddingarfyritøkunum er Trepca 89 ein risa favorittur til dystin í kvøld, tí ein sigur til meistaraliðið frá Kosovo, gevur bara 1,38 ferðir pengarnar aftur. Javnleikur gevur 4,70 ferðir pengarnar aftur.
Dysturin millum Trepca 89 og Víking byrjar í kvøld klokkan 17:00, og Rás 2 sigur beinleiðis frá dystinum.
