Tín hundur - tín lortur!
Soleiðis siga tey í Vestmanna kommunu, har tey í 2019 fóru undir eitt átak at fáa hundaeigarar at taka upp eftir hundunum.
Men, tíverri eru tað framvegis nógvir hundalortar at síggja, ásanna tey í Vestmanna.
Í kommununi vita tey ikki, um talan er um leysgangandi hundar, ella um tað framvegis eru eigarar, sum ikki taka upp eftir hundinum.
- Men, vónandi er tað ikki so, verður lagt aftrat.
Tey heita tí enn einaferð á hundaeigarar um at taka upp eftir hundinum, og hundaposar fáast til keyps í flestu matvøruhandlum.
Í Vestmanna kommunu siga tey, at um leysgangandi hundar ella onnur djór eru til ampa hjá fólki, skal sigast frá á politistøðini.
- Løgreglan setir seg síðan í samband við aktingarmannin, verður lagt aftrat.
