Tað er ógvuliga avmarkað, hvussu nógvir talgiltir undirvísingarmiðlar eru á føroyskum, og tað kann fáa sera stórar avleiðingar fyri føroyska málið.
Tað sigur Vár í Ólavsstovu, granskari, við Skúlablaðið
Uttanlands framleiða forløg, ið gera undirvísingarmiðlar, hópin av talgildum undirvísingarmiðlum. Í Føroyum eru vit so smátt byrjað, men enn rúgvar tað, ið er komið, ógvuliga lítið.
- Talgildingin, vit síggja í dag, kann vera deyðin hjá føroyskum, men hon kann eisini verða bjargingin, um vit eru við, tað vil siga, um almennu myndugleikarnir eru við og tryggja, at føroyskt verður málið á øllum miðlunum. Tað kostar, men tað sleppa vit ikki undan, sigur Vár í Ólavstovu.
Hon er saman við øðrum í ferð við at granska í, hvussu talgildir miðlar verða og kunnu verða brúktir í undirvísingini.
- Við verkætlanini hevur tað týdning hjá okkum at vísa, hvat vit kunnu fylla í teldlarnar og tøknina, sum er partur av undirvísingarrúminum, sigur Vár í Ólavstovu við Skúlablaðið.
