Tað gekk sum eftir ánni hjá NSÍ leygardagin. Eftir at besta liðið vann 3-0 á vøllinum við Løkin ímóti ÍF, vann næstbesta liðið 4-0 ímóti HB.
Úrslitini bera við sær, at NSÍ er ovast í næstbestu deildini, og at NSÍ – í hvussu so er inntil seinnapartin sunnudagin – er ovast í bestu deildini.
At tað er stór kapping um plássini hjá NSÍ sást leygardagin aftur í, at talan var um sera væl mannað lið í næstbestu deildini. Miðvallarin Jann Martin Mortensen, sum leingi hevur verið skaðaplágaður, skoraði síðsta málið í 4-0 heimasigrinum ímóti HB. Tað kundi bent á, at Jann Martin er um at koma fyri seg aftur.
KÍ roynir at hanga í NSÍ. Leygardagin vitjaðu klaksvíkingar Giza Hoyvík í Gundadali. Tað endaði málleyst. Serliga fram ímóti dystarenda pressaði KÍ fyri at skora sigursmálið, men tað eydnaðist ikki.
Suðringar høvdu vitjan av Víkingi, sum fór til hús aftur við 3-1 sigri. Sigurin varð staðfestur í evstu løtu, tá ið heimaliðið spenti álopsbogan av álvara.
B36 hevur ikki staðið seg væl í fyrstu umførunum. Leygardagin vitjaði botnliðið ÍF í Gundadali. Heimaliðið mannaði seg við eitt nú venjaranum hjá Effo-liðnum Jákupi á Borg og miðvallaranum Símuni Joensen, sum áður hevur spælt á besta liðnum í bæði KÍ og B36. Hesir báðir vóru millum málskjúttarnar í trivaliga 5-0 heimasigrinum.
Hinir málskjúttarnir vóru 18 ára gomlu Gilli Samuelsen og Hugin Samuelsen og 21 ára gamli Magni í Køk. Nú eru bara tvey stig frá B36 og fram til Giza Hoyvík, sum er nummar átta.
Í kappingini um møguliga at vinna uppflyting vann AB lyklauppgerðina á heimavølli ímóti B68 2-0.
NSÍ-HB 4-0 (2-0)
1-0: Aron Knudsen 39.
2-0: Sølvi Sigvardsen 42.
3-0: Jann Martin Mortensen 61.
4-0: Mórits Heini Mortensen 73.
B36-ÍF 5-0 (2-0)
1-0: Hugin Samuelsen 21.
2-0: Jákup á Borg 26.
3-0: Magni á Køk 56.
4-0: Símun Joensen 66.
5-0: Gilli Samuelsen 81.
Giza Hoyvík-KÍ 0-0
AB-B68 2-0 (1-0)
1-0: Jobin Drangastein 8.
2-0: Jónas Stenberg 78.
Suðringar-Víkingur 1-3 (1-2)
0-1: Fannhard Skoradal 11.
1-1: Tóki Mortensen 18.
1-2: Hans Jákup Lervig 39.
1-3: Elias Lervig 90.
NSÍ 22 stig
KÍ 19 stig
AB 18 stig
B68 15 stig
Víkingur 15
HB 14 stig
Suðringar 10 stig
Giza Hoyvík 9 stig
B36 7 stig
ÍF 0 stig
NSÍ og ÍF hava spælt 10 dystir, B68 og Giza Hoyvík hava spælt 8 dystir, og hini liðini hava spælt 9 dystir
10. umfar
Leygardagin 27. mai
KÍ-B68
Víkingur-AB
HB-Giza Hoyvík
B36-Suðringar
28. mars
ÍF-NSÍ 1-7
