Tað var tiltikið, tá ið klaksvíkingar fóru suður fyri bjørg og í høvuðsstaðin til fótbóltsdyst.
Soleiðis hevur tað ikki verið seinnu árini, tí tað er fast samband, og tí KÍ ikki hevur verið partur av toppinum tey seinnu árini.
Í dag er øðrvísi. Smyril legði at á Kósini, tá ið klokkan var farin av eitt, og trý korter seinni vóru allir 975 áskoðararnir – ein og ein – komnir umborð. Smyril bakkaði út á Pollin, og so var í dýrdarveðrinum ferð sett á suður eftir.
Hýrurin er av tí besta. Eftir nógvar fyrireikingar fleiri tey seinastu kvøldini fór KÍ legan í skrúðgongu av vøllinum á Eiðinum í Klaksvík og ígjøgnum býin. Áskoðararnir eru klæddir, sum tað sømir seg teimum, ið skulu tit finalu, og tað var tónleikur, sangur og góður hýrur.
Á veg suður eftir er lívligt umborð. Ferðafólkini leggja nógv eftir seg í sølubúðunum, og bæði í kafeteria og úti á dekkinum er tað sera góður hýrur.
Klokkan 15.15 fer Smyril at leggja at í høvuðsstaðnum, og so fer bláa og hvíta ferðalagið at seta sín dám á høvuðsstaðin, sum tað gjørdi fyrr í dag á heimavølli, sum myndin vísir so væl.
