Tað kom óvart á, tá Svanna og Hans Pauli Poulsen fóru avstað við FM-heitinum í tvíspor fyri vaksin. Svanna skuldi bæði vinna og fáa hjálp, fyri at vunna knúgva Fúsa og Benitu G. Davidsen.
Hóast tað var ein ávísur spenningur, undan kappingina leygardagin, mundi tey flestu helst vænta, at tað fór at vera fleirfaldi føroyameistarin Fúsi ið fór at standa eftir við FM heitinum, skrivar Føroya Ríðingarfelag. Fúsi hevði trý stig fleiri enn Svanna úr Havn, hetta merkti at tað ikki var nokk hjá Svannu at vinna, har skuldi vera minst eitt annað ross millum hana og Fúsa.
Svanna og Hans Pauli Poulsen gjørdi eisini sína skyldu, tey vóru í næstseinasta riðlinum og vunnu trygt á Óðin við Sórun Poulsen á baki. Tíðin hjá Svannu var 34,0. Fúsi við Beintu G. Davidsen á baki høvdu tó allar møguleikar, tá tey skulda ríða móti Freyr og Bryndis Hjartardóttir.
Tað gjørdist tó ikki nøkur løtt uppgáva hjá Fúsa, rossini fylgdist fyrstu 250 metrarnar, men frá har av fóru Freyr og Bryndis Hjartardóttir so líðandi undan Fúsa, sum hesar seinast metrarnar, tapti bæði riðil, kapping og FM heitið. Tíðin hjá Freyr var 34,3 og Fúsi fekk 34,5.
Sostatt vann Svanna FM heitið í Tvíspor vaksin 2017. Sama stigatal sum Fúsi, men tá er tað tann sum er fremst á Heystkappríðingini sum vinnur FM. Vinnarir í hinum bólkunum vóru, Skeið Gylling og Regin Johannesen, Trav Fenja og Hallur Hansen, Tvíspor ung, Spirit og Randarsól Heinesen, Tvíspor Vaksin ll flokkur, Tittan og Geir Wardum.
