Sundabáturin fer á ólavsøku sum FM vinnari í kappingini millum 6-mannafør við monnum. Tað varð staðfest í dag, tá ið Sundabáturin í flottum endaspurti fór um málið hálvaaðru bátslongd undan næsta avbjóðaranum.
Sundabáturin hevur 41 stig, og teir næstu í røðini eru Páll Fangi og Smyril, sum báðir hava 31 stig.
Hetta er fyrsta ferðin, at Sundabáturn vinnur FM síðani 2017. Sundabáturin hevur eisini vunnið FM í 2004, 2007 og 2008.
Páll Fangi var fremstur í startinum, meðan starturin hjá Sundabátinum ikki var góður. Smyril var tann fyrsti, sum bjóðaði Páll Fanga av, men tað var skjótt, at Sundabáturin fann stevið og smátt um smátt legði seg í kappingina um fremsta plássið. Tað plássið vann hann, tá ið teinurin var gott og væl hálvrógvin, og á málinum vann nýggi FM vinnarin greitt fremstur.
Páll Fangi vann kappingina um næstfremsta plássið. Tað mundi vera góð kensla hjá ungu klaksvíkingunum, sum í Miðvági endaðu heilt aftarlaga. Tað komst av, at tveir av rógvarunum og róðurskvinnan lógu við koronu, og óvandir avloysarar vóru umborð.
| 1 | Sundabáturin | 05:23.33 | 7 | 0 | 0 |
| 2 | Páll Fangi | 05:26.40 | 6 | 0 | 0 |
| 3 | Smyril | 05:30.03 | 5 | 1 | 0 |
| 4 | Víkingur | 05:32.13 | 4 | 0 | 0 |
| 5 | Fortuna | 05:32.23 | 3 | 0 | 0 |
| 6 | Strálan | 05:32.24 | 2 | 1 | 0 |
| 7 | Hósvikingur | 05:32.44 | 1 | 0 | 0 |
| 8 | Hvessingur | 05:35.36 | 0 | 0 | 0 |
| 9 | Gongurólvur | 05:38.25 | 0 | 0 | 0 |
| 10 | Glyvrabáturin | 05:58.41 | 0 | 1 | 0 |
FM støðan
1 Sundabáturin 41
2 Páll Fangi 31
2 Smyril 31
