Leygardagin verður nógv gjørt burtur úr, tá nýggi kappróðrarbáturin hjá Stráluni á Strondum kemur.
Tað er John Høgnesen úr Norðragøtu, ið hevur smíðað bátin, sum er eitt snotuligt 6-mannafar.
- Vit fara at vísa bátin fram við neystið henda dagin klokkan 17, og tá fara vit eisini at bjóða kaffi, te, kaku, twix, svali og karamellur, sigur formaðurin í Stráluni, Anfinn Gærdum.
Í samband við tiltakið fer Strálan eisini at selja venjingarútgerð, sum hevur staðið í fyrrverandi venjingarhølunum.
- Her fara vit eitt nú at selja tvær rógvimaskinur, súkklu, crosstrainer, steppara, ryggbonk og ymiskt annað.
Formaðurin í Stráluni sigur, at tey hava ikki pláss fyri hesi útgerð í nýggju venjingarhølunum, og tí fara tey at selja útgerðina fyri hægsta boð.
- Vit vilja heldur fáa nøkur oyru burtur úr hesum, enn at útgerðin stendur fyri einki. Høvið verður hjá keyparum at gjalda við korti, leggur fryntligi formaðurin í Stráluni aftrat.
