Eftir seks kappróðrar ber tað ikki til at mynda betri fyritreytir fyri spennandi finalu enn henni, sum nú bíðar millum Royndina Fríðu úr Vági og Blik av Argjum við dreingjamanningum.
Í Sørvági var einki at rafla um. Eftir at Royndin Fríða hevði vunnið bæði í heimasjógvi á Jóansøku í Vági og aftur á Fjarðastevnu í Vestmanna, vóru tað teir av Argjum, sum so rudduliga settu dagsskránna í Sørvági.
Blikur togaði seg í fyrstu tøkunum eitt vet framum Royndina Fríðu, og Blikur var fremstur allan teinin. Fjarstøðan longdist eitt vet millum teir báðar fremstu, og á málinum var Blikur tað mesta av einari bátslongd frammanfyri.
Blikur hevur vunnið tríggjar ferðir, og Royndin Fríða hevur vunnið tríggjar ferðir. Blikur hevur tríggjar ferðir verið næstfremstur, og Royndin Fríða hevur tríggjar ferðir verið næstfremst. Tað stendur á jøvnum í stigum – 39 stig í part – og tann, sum verður fremri av hesum báðum á Ólavsøku verður meistari.
Kappingin um triðja plássið var leingi tøtt og spennandi. Firvaldur av Tvøroyri var drúgvastur, og á málinum var hann skutin frammanfyri Teistan, Jallin og Svan, sum vóru sera javnir. Junkarin og Havfrúgvin vóru aftastir.
1 Blikur 05:01.18
2 Royndin Fríða 05:03.05
3 Firvaldur 05:07.04
4 Teistin 05:08.04
5 Jallurin 05:08.05
6 Svanur 05:08.22
7 Junkarin 05:14.02
8 Havfrúgvin 05:32.06
Støðan
1 Blikur 39
2 Royndin Fríða 39
3 Firvaldur 24
4 Svanur 18
5 Teistin 18
6 Jallurin 18
7 Sílið 8
8 Junkarin 4
