Ísland er millum londini, sum fleiri og fleiri fólk velja at ferðast til. Men ferðafólkastreymurin er nú so stórur, at Ísland er á lista yvir lond, hagar mælt verður frá at fara, um ein vil sleppa undan nógvum ferðafólki.
Heimasíðan holidayguru.dk, sum gevur góð ráð um ferðir kring allan heimin, hevur júst kunngjørt ein lista við 10 ferðamálum, sum tey mæla fólki frá at fara til, um tey vilja sleppa undan at renna seg í nógv onnur ferðafólk, meðan tey sjálv halda frí.
Heimasíðan skrivar, at um ein kortini velur at fara til Íslands at ferðast, so mæla tey til at roynt verður at finna onnur áhugaverd støð enn tey, sum flest øll ferðafólk vitja, tá tey eru í Íslandi. Í hesum sambandi verður víst á, at roknast kann við, at eitt nú Bláa Lónið er yvirfloymt av ferðafólki.
Á listanum hjá holidayguru.dk eru níggju onnur ferðamál, har eisini kann roknast við stórum ferðafólkafloymum. Tey eru Isle of Skye í Skotlandi, Barcelona, Dubrovnik, Venesia, Santorini, Galapagosoyggjaranar, Taj Mahal í India, París og Bali.
