Tað endaði 2-2, tá ið B68 í kvøld hevði vitjan av Víkingi, sum var frammanfyri 1-0, tá ið tað var hálvleikt, og sum javnaði til 2-2 við brotssparki, tá ið tíðin var um at vera farin.
B68 roynir at renna undan 07 Vestur, TB og FC Suðuroy, sum eru í harðari kapping um at sleppa undan niðurflyting.
Einki av hesum trimum liðunum vann stig í dag. Tí var tað góður dagur hjá toftamonnum, tá ið tað eydnaðist teimum at vinna eitt stig og harvið at økja um frástøðuna til áttanda plássið til sjey stig. Men inntil tíðin var farin ein minutt út um vanligu leiktíðina, sá tað uppaftur betur út hjá B68, tí tá vóru toftamenn frammanfyri 2-1.
So var tað, at víkingarnir vunnu brotsspark, sum Sølvi Vatnhamar sendi heilt upp í málkrókin til vinstru fyri seg sjálvan. Tað var eisini Sølvi Vatnhamar, sum eftir 20 minuttir legði Víking á odda 1-0. Tað gjørdi hann úr stuttari fjarstøðu eftir fínt álop í vinstru. Olaf Bárðarson spældi til Inga Jonhardsson, sum av baklinjuni legði út frá til Sølva Vatnhamar.
Tað gekk báðar vegir, og tað var øgiliga intenst. So var tað miðskeiðis í seinna hálvleiki, at B68 í ein minutt skoraði tvey mál og legði seg á odda 2-1, og leingi sá tað út til, at soleiðis fór tað at enda.
Djóni Samuelsen javnaði til 1-1, tá ið hann liggjandi og úr stuttari fjarstøðu royndi seg, og bólturin fór í málið umvegis stólparótina. Og so var tað raski og eyðsýndi Hanus Højgaard, sum legði B68 á odda, tá ið hann royndi seg av brotsteigarmarkinum, og bólturin umvegis stólpan fór í málið. Møguleikin stóðst av mistaki í uppspælinum hjá Víkingi á egnari hálvu.
Aftur í kvøld var 18 ára gamli Arnór Brandsson millum teir fyrstu ellivu hjá Víkingi. Hann var á miðvøllinum saman við Aron Jarnskor Ellingsgaard og Sølva Vatnhamar, og tað sær út til, at Arnór er í holtur við at menna seg til leiklut millum teir fyrstu ellivu.
Fyrr í ár vann Víkingur 1-0 á Svangaskarði og 2-1 á heimavølli ímóti B68. Í báðum førum var Poul Kallsberg málskjútti. Í kvøld var Poul Kallsberg millum áskoðararnar. Hann er komin heim úr Hillerød at vera við í fyrireikingunum til landsdystirnar ímóti Kroatia og Gibraltar.
Sjálvandi hevði tað verið kærkomið hjá Jóhan Petur Poulsen, um hann hevði Poul Kallsberg og Árna Nóa Atlason á liðnum. Árni er farin til Noregs, og Poul er í Danmark. Hjá Víkingi er tað soleiðis, at tá ið tað eru nakrir, sum fella frá, so eru tað aðrir, ið taka við. Í kvøld var hetta sjón fyri søgn. Ivaleyst kostar tað í stigum, og nú er Víkingur bara tvey stig frammanfyri B36 í kappingini um fjórða plássið. Men hetta er politikkurin hjá teimum í Sarpugerði, og tað hjálpir upp á støðuna, at tað sær út til, at Atli Gregersen fer at vera á liðnum fram til og við steypafinaluna, sum verður 31. oktober.
Næsti dystur hjá B68 verður 14. september á útivølli ímóti EB/Streymi.
Næsti dystur hjá Víkingi verður 15. september á útivølli ímóti KÍ.
##med2##
B68 – Víkingur 2-2 (0-1)
0-1: Sølvi Vatnhamar
1-1: Djóni Samuelsen
2-1: Hanus Højgaard
2-2: Sølvi Vatnhamar br
Dómari: Jóhan Hendrik Ellefsen
B68: Tórður Thomsen – Fríði í Túni Petersen, Aleksander Ó. Jensen, Aron Reinert Hansen, Marius Nón – Jákup N. Vilhelmsen, Patrick Mensah – Hanus Højgaard, Emanuel Kulego, Djóni Samuelsen – Sebastian Lau Nielsen
Víkingur: Bárður á Reynatrøð – Ari Olsen, Atli Gregersen, Arnbjørn Svensson, Ingi Jonhardsson – Aron Jarnskor Ellingsgaard, Arnór Brandsson, Sølvi Vatnhamar – Jákup Johansen, Jørgen Nielsen, Olaf Bárðarson
