Tað skal vera forboðið at koyra við píkadekkum í Havnini. Og tey, sum kortini tvíhalda um at koyra við píkadekkum, skulu rinda eykaskatt til Tórshavnar Kommunu.
Tað er endamálið hjá Heðin Mortensen, borgarstjóri í Havn.
Í dag er 16. oktober, og sostatt er aftur loyvi til at seta píkadekk undir bilin. Men stendur tað til Heðin Mortensen, skal at kalla øll Havnin vera píkafrítt øki.
Heðin Mortensen er eisini løgtingsmaður, og hann sigur, at nú fer hann at reisa spurningin í løgtinginum um at geva kommunum fríari ræsur at skipa ferðsluna, soleiðis sum kommunan heldur vera best. Og í hesum sambandi hugsar hann ikki minst um píkadekkini.
Les eisini, at dekksølumaður heldur, at píkar gera størri skaða enn gagn
- Bara neyðsendarakfør, og aðrir serligir bilar, skulu hava loyvi til at koyra við píkadekkum í Havn, sigur Heðin Mortensen.
- Og allur bilarnir við píkadekkum, sum koma til Havnar hvønn morgun, skulu parkera í Gundadali, ella enn longur burturi, og so kunnu fólkini ganga oman í býin, ella brúka bussleiðina.
- Men eru tað kortini bilførarar, sum tvíhalda um at teir vilja koyra við píkum, skulu teir rinda eitt eykagjald í kommunukassan fyri tað.
Borgarstjórin vísir á, at nú á døgum eru kavadekkini so góð, at tað er óneyðugt at koyra við píkum, uttan í nøkrum heilt fáum undantaksførum. Harafturat ímóti er tað enntá eisini tátt stóran part av vetrinum.
Hinvegin fara píkadekkini ómetaliga illa við vegunum.
- Vegirnir verða grivnir upp, og tað kostar Tórshavnar Kommunu milliónir í asfaltering hvørt einasta ár. Avleiðingin er eisini, at vit koma alt ov sjáldan út um miðbýin við asfalteringini, tí píkadekkini grava vegirnar so illa upp, at vit noyðast at asfaltera somu vegir aftur og aftur.
Heðin Mortensen sigur, at talan er sanniliga eisini um ein umhvørvisspurning.
- Píkadekkini grava vegirnar upp, so at luftin er full av asfaltdusti, sum fólk so anda í seg. Serliga vandamikið er hetta fyri børn, tí tey eru so lítil, at tey eru bara í dekkhædd og sostatt fáa serliga nógv av asfaltdustið í seg, sigur Heðin Mortensen.
