Mikudagin kunngjørdi italska høvuðsstaðarfelagið, Lazio, at felagið hevði sett væl kenda og umstrídda argentinska venjaran, Marcelo Bielsa, í starv. Sagt varð, at Bielsa kom til Rom í vikuskiftinum at byrja at seta sítt fingramerki á liðið, sum skuldi byrja at venja leygardagin.
Men soleiðis verður ikki. Í dag er Lazio komin við teimum skelkandi boðum, at Bielsa hevur lagt starvið frá sær - tveir dagar eftir, at hann bleiv settur.
- Púra óvæntað hevur Marcelo Bielsa frásagt seg starvið hjá okkum. Hetta er í stríð við tær avtalur og skyldur, ið vórðu undirskrivaðar í síðstu viku í samráði við italska fótbóltssambandið, skrivar Lazio í einum tíðindaskrivi.
Marcelo Bielsa er kendur venjari, sum áður hevur verið venjari hjá landsliðnum hjá Kili og og baskiska Athlétic Bilbao.
Seinasta venjarastarvið, sum Bielsa hevði, var í franska Marseille fyri einum ári síðani. Tá valdi hann at siga seg úr starvi aftaná ein einstakan dyst sum venjari hjá franska stórfelagnum.
