Tað sigur Búskaparráðið í várfrágreiðingini, sum ráðið legði fram í Varpinum í Klaksvík hósdagin.
Ávísin fyri fíggjarpolitiska haldførið er -9% av BTÚ, vísir nýggja greiningin hjá Búskaparráðnum. Av tí, at tað í framtíðini ikki verður sama lutfall millum tal av forsyrgjarum og tey, ið skulu forsyrgjast, sum í dag, verður fíggingartørvurin komandi 40 árini 45 mia. kr.
Í núverandi lóggávu er samtykt at hækka pensjónsaldurin við einum hálvum ári í 2025 og 2030, men tað røkkur ikki til at loysa haldførisavbjóðingina. Hækkar pensjónsaldurin ístaðin við einum ári fimta hvørt ár frá 2035, gerst fíggjarpolitikkurin við tíðini haldførur, og fíggingartørvurin minkar niður í 12 mia. kr. komandi 30 árini. Politiska skipanin noyðist tí at fremja nýskipanir og átøk, sum minka um útreiðslurnar og økja inntøkurnar, umframt at hækka pensjónsaldurin við einum ári fimta hvørt ár.
##med2##
Eitt fíggjarpolitisk regluverk ger, at tað fæst tamarhald á útreiðsluvøkstrinum. Politiska skipanin eigur í eini breiðari semju, at seta sær mál fyri úrslitið hjá almenna geiranum 10 ár fram í tíð, ið er í samsvar við ein haldføran búskap í langa høpinum, tað vil siga hjá landi og kommunum undir einum. Tá tað er gjørt, verður mett um inntøkurnar í hesum tíðarskeiði og síðani verður roknað, hvørjar útreiðslur inntøkurnar røkka til, treytað av, at málið fyri úrslitið verður rokkið. Landið eigur í hesum sambandi at samráðast við kommunurnar um ein útreiðslukarm fyri til dømis eitt fýraára tíðarskeið, ið liggur fastur, men sum kommunurnar frítt kunnu raðfesta innanfyri.
