Tà ið vit sunnudagin høvdu samband við ávíkavist politiið í Eysturoynni og í Norðoyggjum í telefonini, vóru boðini greið úr báðum støðum:
- Vit hava havt eitt óvanliga friðarligt vikuskifti, og tað hevur einki sum helst verið at gjørt. Eingin er tikin fyri at koyra fullur, einki ferðsluóhapp hevur verið, og tað hevur verið serstakliga friðarligt, var sagt á báðum politistøðunum.
Óhapp við Vágatunnilin
Eisini løgreglan í Havn boðaði frá einari serstakliga friðarligum vikuskifti. Leygarnáttina var ein maður tikin fyri at koyra fullur á einum prutli á Eystara Ringvegi, og hann var tikin við á politistøðina, har blóðroynd varð tikin.
Sunnudagin var ein kvinnuligur bilførari tikin fyri at koyra við kenning, og hon var eisini tikin við á politistøðina.
Um sekstíðina sunnumorgunin var eitt lítið ferðsluóhapp uttan fyri tunnilsmunnan til Vágatunnilin Streymoyarmegin, og ein persónur varð fluttur á skaðastovuna til nærri kanningar.
Vakthavandi á politistøðini í Havn sigur, at tað annars hevur verið eitt sera friðarligt vikuskifti, og at tað ikki hevur verið so nógv fólk í býnum. Vakthavandi væntar tó, at komandi vikuskifti verður væl meira av fólki í býnum, tí tá fara jólaborðhaldini av álvara at taka dik á seg.
