Mentamálaráðið hevur móttikið mótmælisskriv frá lærarunum í føroyskum á studentaskúlunum. Lærararnir finnast at ætlanini hjá Mentamálaráðnum um ikki at loyva næmingum at fyrireika seg til próvtøkutekstirnar í bólkum frammanundan próvtøkuni í skrivligum føroyskum, og at Mentamálaráðið hevur lagað próvtøkutilfarið so, at ein partur verður í talgildum líki.
Mentamálaráðið harmast um atfinningarnar og hevur á fundi í dag saman við avvarðandi pørtum loyst málið.
Tað sigur Mentamálaráðið í tíðindaskrivi í kvøld.
- Viðvíkjandi bólkafyrireiking ásanna vit, at málið ikki hevur verið nóg væl lýst, og tí er gjørt av, at tað framhaldandi verður loyvt at nýta próvtøkuháttin við bólkafyrireiking.
Mentamálaráðið ásannar somuleiðis, at kunningin og tilgongdin viðvíkjandi talgildum uppgávum ikki hevur verið nøktandi. Partarnir er tó samdir um, at víðkanin av uppgávusettinum við tveimum talgildum uppgávum gevur næmingunum eitt breiðari tekstgrundarlag.
- Fyri próvtøkubyrjan verða næmingarnir kunnaðir um, at talan er um valmøguleikar og ikki krav, og at teirra val av uppgávu ikki hevur ávirkan á, hvussu avrikið verður dømt. Sostatt skuldu ivamálini í sambandi við próvtøkuna í føroyskum verið beind av vegnum, sigur Mentamálaráðið.
Í desember 2004 var royndarætlan við bólkafyrireiking til próvtøkuna í føroyskum sett í verk á Føroya Studentaskúla og HF-skeiði. Endamálið var at royna í verki henda próvtøkuhátt í føroyskum m.a. við atliti at, at farast skuldi undir at endurskoða miðnámsútbúgvingarnar. Royndarætlanin við bólkapróvtøku varð framd og eftirmett.
- Tá vit gjørdust vitandi um, at Føroya Studentaskúli og HF-skeið hevur hildið fram við hesum próvtøkuhátti, vórðu boð givin skúlanum, at hesin próvtøkuháttur ikki skuldi nýtast í ár.
Mentamálaráðið ásannar, at málið ikki hevur verið nóg væl lýst, áðrenn henda avgerð varð tikin.
- Tí hava vit í samráði við rektararnar fyri studentaskúlarnar, lærugreinaráðgevanum í føroyskum og umboði fyri uppgávunevndina tikið avgerð um, at Føroya Studentaskúli og HF-skeiði fær loyvi at nýta próvtøkuháttin við bólkafyrireiking til próvtøkuna í ár, sigur Mentamálaráðið eitt nú í tíðindaskrivi.
Lagt verður aftrat, at fyri próvtøkuna verða næmingarnir kunnaðir um, at uppgávurnar við talgildu tekstunum eru valmøguleikar og ikki krav, og at teirra val av uppgávu ikki hevur ávirkan á, hvussu avrikið verður dømt.
