Fleiri tíðindafólk eru deyð í tænastu í ár enn nakað av teimum undanfarnu 15 árunum.
Tað sigur altjóða fjølmiðlastovnurin, International Press Institute.
Higartil í ár eru 119 tíðindafólk deyð, og tað er tað mesta, síðani stovnurin fór undir hesi hagtølini í 1997.
Sýrialand er vandamiklasta landið í ár, tí har hevur tað kostað 36 tíðindafólkum lívið, at tey vildu siga ræðuleikunum í borgarakrígnum.
Síðani koma Somalia, Mexiko, Pakistan og Filipsoyggjar á yvirlitinum yvir vandamikil lond hjá tíðindafólkum at vera til arbeiðis.
