Lurtararnir fáa her høvi til at geva gávur, men tó ikki til sjálvt “føðingardagsbarnið”.
Stuðulin fer hinvegin til arbeiðið hjá føroyskum trúboðarafamiljum, sum virka í trimum ymiskum londum.
- Hesi hava tað í felag, at tey virka við hjálpararbeiði millum børn og ung, verður sagt úr Lindini.
Stuðulssendingin byrjar leygarkvøldið kl.19 og varir fram ímóti midnátt.
Trý endamál
Peningagávurnar, sum koma inn fara óskerdar til barnaarbeiði hjá hesum:
Jórun og Nurlan Malaikev, sum eru trúboðarar hjá Heimamissiónini. Jórun er úr Vestmanna og Nurlan úr Kiev, har tey virka. Tey arbeiða millum foreldraleys børn og gøtubørn í og nærhendis Kiev í Ukraine. Tey royna at hjálpa teimum at fáa eina betri byrjan uppá vaksnamannalívið. Stuðulin, sum tey fáa leygarkvøldið, fer til at lata nøkur av hesum børnunum koma á eina barnalegu.
Jens og Malena Meitilberg, sum eru úr Havn, eru trúboðarar hjá Hvítusunnusamkomuni og virka í Nakuru í Kenya. Tey arbeiða m.a. millum gøtubørn geva teimum mat og syrgja fyri skúlagongd. Stuðulin skal nýtast til liðugtgerð av einum húsum, sum skal vera eitt heim fyri heimleysar og illa viðfarnar ungar gentur.
Miriam og Rógvi Rasmussen, sum eru úr Runavík, virka sum trúboðarar innan Brøðrasamkomuna m.a. gera tey eitt arbeiði millum børn í Ghindari í Rumenia, og tey ynskja at stuðulin, sum kemur inn leygarkvøldið, skal fara til barnaleguarbeiðið fyri hesi børn.
