Kyndil og VÍF høvdu tamarhaldið á hvør sínum hálvleiki. Tað er, sum heimasíðan hjá Kyndli skrivar.
– Vestmenningar iðra seg um seinna hálvleik, og kyndilsmenn spyrja, hvat gekk galið í fyrra hálvleiki, er skrivað.
Liðini fylgdust fyrstu løtuna, men miðskeiðis í fyrra hálvleiki fór VÍF avstað og vann sær eina greiða leiðslu. Vestmenningar vóru eitt skifti á odda við sjey málum.
Heimaliðið var sum hamskift eftir steðgin. Verjuspælið var munandi meira sannførandi, og tað kom av álvara veiggj í álopsspælið. Høgni Klein-Olsen stóð seg millum annað væl.
VÍF var á odda 23-16, tá ellivu minuttir vóru spældir av seinna hálvleiki. Næstu tólv minuttirnar fingu vestmenningarnir einki mál. Tá teir loksins fingu hol á aftur, var Kyndil á odda 25-24.
Hans Áki Dal-Christiansen hevði møguleikan at tryggja Kyndil bæði stigini, men Eli Muller vardi fyri í seinastu royndini.
Hava runnið aftaná
Kyndil og VÍF hava roynt at vunnið seg nærri finaluplássinum seinastu vikurnar, men liðini hava ikki tikið av gyltu møguleikunum. Bæði Kyndil og VÍF stevndu móti sigrunum í dystunum móti KÍF í januar, men kollfirðingar vunnu seg aftur seinastu løtuna.
Í gjár tapti KÍF fyri H71. Men Kyndil og VÍF snávaðu aftur. Javnleikurin í høllini á Hálsi blæsir ikki stórvegis spenning í finalustríðið aftur.
