Í sambandi við at Landsskjalasavnið fylti 75 ár 1. juli, skipar savnið fyri stórari ráðstevnu um varðveitslu av skjølum
Landsskjalasavnið fer at hátíðarhalda 75 ára dagin við stórari ráðstevnu, í Norðurlandahúsinum, fríggjadagin 31. august og leygardagin 1. september 2007.
Endamálið við ráðstevnuni er at varpa ljós á varðveiting av skjølum fyrr og í framtíðini. Í hesum sambandi koma útlendskir skjalasavnsvørðar at halda fyrilestur um evnið.
Landsskjalasavnið er ein stovnur í støðugari menning. Øll kunna koma á Landsskjalalasavnið, og biða um loyvi at síggja skjøl og seta spurningar. Hvørt ár vitja eini 2500 fólk lesistovuna hjá savninum og framsýningarnar, sum savnið skipar fyri. Stórsti partur av teimum, sum brúka lesistovuna eru fólk, sum fáast við ættargransking og ættarsøgu.
Endamálið hjá Landsskjalasavninum er at savna, varðveita, skipa og at røkja øll søgulig skjøl og keldur. Umframt at stovnurin sjálvur ger uppsøkjandi arbeiði, koma fólk eisini og handa savninum skjøl.
Landsskjalasavnið hevur stórar goymslur. Kongsbókin, frá 1298, er elsta savnindi, ið er varðveitt á savninum, ið eisini goymir øll embætsissøvn hjá bæði føroyskum og ríkssmyndugleikum. Savnið hevur m.a. kort, brævaskifti, tekningar, mikrofilmar og filmar í varðveitslu.
Landsskjalasavnið hevur í dag, eftirlit við umleið 15 kilometur langari røð av almennum skjølum, sum eru í varðveitslu á ymsum stovnum kring í landið. Harafturat veitir savnið ráð og vegleiðing til feløg og privat virki um bygnað og um, hvussu skjøl teirra verða varðveitt á besta hátt.
