- At sýna bilar skal ikki vera ein uppgáva hjá privatum verkstøðum.
Tað heldur Kári P. Højgaard, landsstýrismaður í innlendismálum.
Nú tað kom fram í síðstu viku, at Akstovan hevur so tepra játtan, at heilir 11.000 bilar bíða eftir at sleppa til regluligt sýn.
Í hesum sambandi tók spurningurin seg eisini upp, um bilasýn ikki var ein uppgáva, sum privat bilaverkstøð kunnu røkja eins væl og Akstovan.
Men tað heldur landsstýrismaðurin í innlendismálum ikki.
- At sýna bilar eigur at vera ein almenn uppgáva, heldur hann.
Hann heldur ikki, at tað er nakað gott hugskot at privat verkstøð skulu sýna bilar, sum tey síðani sjálvi skulu umvæla, tí tað er har, at tey vænta at fáa vinningin.
Stúrir tú fyri, at tey fara at seta ríkiligt av krossum á sýnsváttanina fyri at fáa meiri at gera?
- Tað sigi eg ikki. Men eg haldi, at tað hevur stóran týdning, at vit hava ein einsháttað bilasýn um alt landið.
- Sum bilasýnið er nú, eru tað serfrøðingar frá Akstovuni, sum hava eitt púra einsháttað sýn við serútgerð kring alt landið.
- Tað haldi eg, er ein góð skipan.
Kortini roynir landsstýrismaðurin at útvega Akstovuni eina hægri játtan, so at hon fær ráð til at seta fleiri fólk at sýna bilar.
Tað hevur verið frammi, at gjaldið fyri at fáa nummarplátu og onnur brúkaragjøld, skuldu hækkast, tí tey hava staðið í stað í nógv ár.
Men Kári P. Højgaard væntar ikki, at tað verður veruleikin.
Hinvegin vísir hann á, at av onkrari orsøk, hevur Løgtingið ásett, at Akstovan SKAL hava eitt avlop á 1,2 millión um árið.
- Av øllum almennum stovnum eru tað bara Rúsan og Akstovan, sum hava eitt avlopskrav, sigur hann.
Og landsstýrismaðurin fer nú at virka fyri, at avlopskravið verður avmarkað, ella stirkað.
- Verður tað strikað, fær Akstovan ráð til at seta trý fólk afturat at sýna bilar, sigur Kári P. Højgaard.
