Við trimum 12-tølum í dugnaskapsroyndini í sigling, gjørdi 15-ára gamli Einar Poulsen úr Porkeri øllum til skammar. Einar Poulsen er nevniliga orðblindur.
Har, sum vilji er, ber alt til. Tað hevur Einar Poulsen prógvað. Hóast nógv stúrdu, tá ið Einar teknaði seg til kvøldskúla, til tess at taka dugnaskapsroynd í sigling, gjørdi hann av at stríðast fyri at koma á mál. Einar er nevniliga orðblindur, og fær bert lisið heilt einfaldar tekstir. Við einum góðum lærara og stuðli heimanfrá, megnaði Einar Poulsen tó at hála eitt framúr støðumet á land.
- Eg fekk 12 í skipsteknikki, sjóreglum og í tólum, sum er at nýta radara, GPS og líknandi, sigur Einar Poulsen.
Umframt hesi trý 12-tølini fekk hann eisini tvey 7-tøl í teimum lærugreinunum, sum krevja meira av lesiførleika – støddfrøði og kort. Tó hevur Einar Poulsen klárað seg yvir miðal í hesum lærugreinum.
Brúkar bæði eygu og oyru
Lívið hjá Einari hevur verið darvað av ósigrum í skúlanum. Hetta hevur uttan iva skumpað undir, at hann ikki hevur hug at ganga í skúla. Tó megnaði lærarin á kvøldskúlanum at fanga Einar Poulsen.
- Lærarin dugdi serstakliga væl at undirvísa. Hann gjørdi sær ómak at lesa alt upp og greiða gjølla frá, sigur Einar Poulsen.
Hinumegin pultin sigur lærarin, Tórgeir strøm, at tað er ein heilt serlig orsøk til, at Einar megnaði at stríða seg til eitt framúr prógv. Útyvir at vera væl upplagdur til hvønn tíma, nýtir hann eisini allar sansirnar, til tess at læra pensum.
- Tað, sum hann ikki megnaði at fáa gjønum eyguni, fekk hann við gjøgnum oyruni. So sat tað, sigur Tórgeir Strøm.
Sjógvurin dregur
»Tú dregur meg sum ein magnetur,« ljómar á fløguni hjá Jens Lisberg, orð eftir Poul F – báðir suðuroyingar, eins og Einar Poulsen. Tað er heldur eingin ivi um, at havið dregur Einar sum ein magnetur. Hann hevur, hóast ungan aldur, longu valt lívsleið sína. Hjá honum er tað bert sjólívið, sum hevur týdning. Sjógvurin er hansara stóri áhugi.
Les meira um Einar Poulsen í Sosialinum á s.6-7.
