Og rætt hevur hann. Reiðarafelagið er eitt gott dømi um tað, at menn sum eru eina frægast fyri, fella fyri freistingini at bróta samanhaldið, sum eigur at vera – bæði millum reiðarar og millum manningarfeløg. Bæði fakfelagsstríð og arbeiðsgevarastríð snýr seg um at standa saman. Fakfeløgini og tess limir skulu standa saman og virða vunnin rættindi og halda fast um og virða tey. Tað sama má arbeiðsgevarin gera. Annars ber einki til, og so verður alt tað reina anarki. Her er so gloppið hjá Viberg Sørensen og hansara monnum, tí aðrir hava givið teimum knívin í ryggin.
Og manningarfeløgini eru ikki smettin frægari. Tað er ein álvarsom vandakós at koyra grús í maskinuna hjá mótpartinum á henda hátt. Nú ber til at seta fólk upp ímóti hvør øðrum - og endin kann vera, at manningarfeløgini standa veikari.
Í fjør blottaði Føroya Fiskimannafelag seg við óvirðiligari framferð ímóti einum starvsfólki. Her tók formaðurin okkurt persónligt stríð fram um felagið og fram um tað mest grundleggjandi hjá einum fakfelag - at virða grundleggjandi fakfelagsrættindi. Hini feløgini í Samtaki stuðlaði hesi sera margháttligu framferðini hjá einum fakfelag, og hóast maðurin, alt snúði seg um er deyður, so er eingin almenn umbering komin frá teimum enn. Tað er lítið sømiligt og vísir, at persónlig maktgirnd skuggar fyri aðalendamálinum, at virða vunnin rættindi.
Vit kunnu halda fram í politikkinum. Løgmaður ger einki, hóast Fólkaflokkurin tekur løgmann av ræði og umskipar landsstýrið eftir egnum høvdi. Men nei, tað fær ongar avleiðingar.
Og Javnaðarflokkurin hevur stórar innanhýsistrupulleikar av tingmanni, sum ikki møtir til fundir. Men flokkurin ger einki. Í síðstu viku speirak hann listarfólk og segði, at mentanarlønirnar til listarfólk áttu at verið avtiknar. Eingin í flokkinum mótmælir. Hóast tey tiga, so vita vit, at tey ikki taka undir við honum, men tey siga einki.
Jú tað snýr seg um vald. Og jú tað snýr seg um pengar. Men onkur má fór ólukkan siga: »Her til og ikki longur«. Men persónlig áhugamál verða tikin fram, og tí er tað sundurlyndi heldur enn samanhald sum verður sett í hásæti – og tað køvir alt samfelagið.
