Og í gjárkvøldið fekk Tjóðveldi so boðini, at Sjúrður Skaale fer úr flokkinum og verður leysgangari á tingi.
Sjúrður Skaale greiðir frá, at hetta sum vera man hevur verið ein trupul avgerð, men hann fær ikki verið við, tá ein politiskur flokkur verður eitt endamál í sær sjálvum. Hann vísir á, at flokkurin bara er eitt amboð, sum kann nýtast til tess at náa nøkrum málum, og tá hansara egni flokkur gongur ímóti tí, sum hann heldur vera rætt, so er bara eitt at gera, og tað er at velja flokkin frá.
Nú eru tey mong, sum finnast at arbeiðinum við stjórnarskipanarnevndini – og skíra tað at vera fjant og fjas – og at politiska skipanin eigur heldur at fáast við veruligan politikk, sum kann tryggja okkum vælferðina.
Treyðugt so verða slík sjónarmið havd á lofti. Men tað skerst ikki burt, at júst stjórnarmálið hevur klovið føroyskan politikk í stórthundrað ár, og at hetta darvar politiska arbeiðinum annars at tryggja vælferðina, sum allir flokkar sjálvandi siga seg vilja. Tá fimm av sjey flokkum á tingi beinleiðis hava sín uppruna ella sum endamál, at Føroyar skulu loysa ella varðveita sambandið, so er tað eitt úttrykk fyri, at hetta er eitt mál, sum fyllir nógv – eitt mál, sum má loysast.
Tí hava vit fleiri ferðir á hesum stað fegnast um, at ein breið semja var í ljósmála. Ein semja, har alt frá Sambandi til Tjóðveldi kundi semjast um ein leist, hvussu vit kunnu koma víðari. At ein strika varð sett í sandin, har vit góðtaka støðuna, sum hon er og semjast um, hvussu tilgongdin skal verða, antin vit velja hesa ella hasa leiðina.
Mangt er, sum veruliga bendir á, at breiða semjan í stjórnarmálum er farin fyri skeytið. Tí tá Tjóðveldi í 13 ár við átta dugnaligum politikarum á tingi, og við næstan fjórða hvørjum veljara aftan fyri seg, ikki fær flutt seg frá ultimativa málinum, so er ikki lætt at tosa »Roma imod«
Sjúrður valdi at fara úr flokkinum. Tjóðveldi og tingfólk annars mugu nú taka støðu til, um vit vilja flyta okkum í stjórnarmálum – ella varðveita naggatódnina. Tey, sum seinast atkvøddu um fullveldi, eru 86 ár og eldri. Við hetta lag hendir einki áðrenn 2046. Men vælsignaði fólk takið eina støðu –?og farið so til arbeiðis!
