Orðini eigur Selma Ellingsgaard, forkvinna í Starvsmannafelagnum, sum her í blaðnum fríggjadag staðfesti, at felagið ikki á triðja sinni ætlar sær at koma aftur frá samráðingum í Fíggjarmálaráðnum sum av torvheiðum.
Seinastu árini hava vit sæð eitt fakfelagssamstarv, sum hevur staðið saman um samráðingarnar. Fyrst vóru tey fimm, síðani fýra, eftir at sjúkrasystrarnar fóru burturúr. Samráðingarnar fyrr í ár vístu, at feløgini høvdu ikki serliga gott stev, og tosað varð um, at feløgini vóru ov ymisk til at kunna samráðast saman.
Tað hevur so ofta verið tosað um eitt breitt føroyskt fakfelagssamstarv, sum vit kenna tað úr øðrum londum, eitt nú LO í Danmark. Tað fakfelagssamstarvið, sum Starvsmannafelagið, Føroya Lærarafelag, Havnar Arbeiðskvinnufelag, Felagið Føroyskir Sjúkrarøktarfrøðingar og Føroya Pedagogfelag skipaðu og undirskrivaði avtalu um í januar í 2010 hevði sum endamál:
...at hava størri styrki sum fakfelagsbólkur, størri ávirkan á arbeiðsgevarar og myndugleikar, størri fakpolitiskar menningarmøguleikar fyri limir, nevnd og álitisfólk, betri tíð og møguleikar at arbeiða við fakfelagspolitiskum viðurskiftum og betri møguleikar at gagnnýta fíggjarligu og menniskjasligu orkuna í feløgunum at sýna samhaldsfesti í verki og orðum, at hava samskifti um og viðgera viðkomandi samfelagslig viðurskifti og at røkja og røkka felags áhugamálum.
Áðrenn hesi fakfeløg aftur setast við borðið hjá sterka manninum í glashúsinum á Argjum, so áttu tey at tikið í egnan barm og lisið sína egnu endamálsorðing. Hetta eru føgur orð – men ikki júst orð, sum feløgini hava livað upp til higartil. Fyrst vóru tað sjúkrasystrarnar, sum fóru burturúr. Hvussu verður til næstu samráðingar er kanska óvist, men okkurt bendi á, at í hvussu so er okkurt av feløgunum ætlaði sær burturúr.
Í øllum førum vóru tað bara pedagogarnir, sum gingu plankan út við seinastu samráðingar. Tey vildu ikki ganga undir treytirnar hjá Jørgen Niclasen og fóru sum tey einastu í verkfall.
Eyðsæð er, at viðurskiftini hjá feløgum eru ymisk. Men felagsmálini eru sjálvandi eins eyðsýnd. Megna feløgini ikki sjálv at liva upp til vøkru endamálsorðingina, so lækka tey sítt egna virði – og skapa gróðrarbotn fyri mytuni um, at brúk ikki er fyri fakfeløgum.
Einki kann verða meira øvugt.
