Upprunin til tiltakið er Planet Awards, sum Miðlahúsið hevur skipað fyri í mong ár. Hesaferð eru Miðlahúsið, Norðurlandahúsið og Kringvarpið gingin saman um tiltakið.
Tiltakið verður fyrst og fremst hildið til tess at heiðra tónleikin og tey fólkini, sum skapa tónleikin. Eisini er endamálið at venda útlendsk eygu hendanvegin at fylgja við, hvørjir okkara dugnaligu tónlistafólk eru. Tað var eitt sindur sigandi, at so nógv av teimum, sum vunnu tónlistavirðislønirnar máttu hava onnur fólk fyri seg at heinta heiðurin.
Onkur var á tonlistaferð í Florida í USA, onkur var í Texas í USA, onkur annar var í Týsklandi og uppaftur onkur var í Danmark. Vit kunnu sjálvandi siga, at mars mánaði ikki er tann rætti til slíkt tiltak, og at tað tí heldur átti at veirð hildið – eins og Planet Awards plagdi at verða – millum jól og nýggjár. Tað er nakað, sum fyrireikararnir eiga at leggja sær í geyma. Men tá tað er sagt, so kunnu vit eisini fegnast um, at okkara tónlistafólk eru so virkin, at so nógv av teimum eru á tónlistaferð úti í heimi.
Sum prikkurin yvir i'ið varð Ársins tónleikaheiður latin – og móttakarin var maðurin yvir øllum innan føroyska tónlist, Simme Jacobsen. Umframt at spæla, yrkja og gera løg, so hevði Simme eisini tónleikahandil í nærum hálva øld. Simme var ímyndin av nýggjara føroyska tónleikinum seinna helming í farnu øld – og hann var helst tann, ið hevði størsta týdningin fyri allar tónleikarar, ið – sperdir fíggjarliga sum teir altíð vóru – kortini kundu keypa frá Simma, sum mangan var lagaligur.
At valið var rætt, og heiðurin uppiborin, vísti fjøldin í Norðurlandahúsinum, sum reistist við lógvabrestum fyri at fagna legenduni, sum nú nú er farin um tey áttati.
Soleiðis er vónin, at hetta afturvendandi tiltakið kann vera við til at stimbra og eggja okkara dugnaligu og evnaríku tónleikarum enn meira.
Vónandi kann FMA eisini eggja okkum øll at varpa ljós á føroyskan tónleik og afturvendandi at heiðra tey, sum ríka okkum so nógv við at skapa tann mentunararv, sum tónleikurin eisini er.
