Eitt er, at metingarnir ikki sampakka heilt við innkomnu tilboðini. Men tá lægsta tilboðið er helvtina dýrari, enn tað, sum Landsverk hevur mett, so er okkurt, sum haltar.
Men í gjár boðar Landsverk frá, at »...í eina tíð hevur verið greitt fyri Landsverki, at tilboðini upp á at byggja Skúladepilin við Marknagil komu at liggja væl oman fyri avsettu játtanina. Stovnurin hevur tí longu í góðari tíð sett í verk arbeiði fyri at finna neyðugar sparingar, so tað letur seg gera at fremja byggiætlanina uttan ov stóran meirkostnað.«
Hetta var nú ein margháttlig niðurstøða at koma við – og í tøkum tíma. Tveir dagar aftan á, at gjørt varð kunnugt, at metingin hjá Landsverki var beinleiðis veruleikafjar, kemur stovnurin við uppskotum, sum minka kostnaðin eini 20 prosent.
Hví eru hesar sparingar ikki gjørdar, áðrenn útboðsarbeiðið var klárt?
Sambært Landsverki standast øktu útreiðslurnar av, at játtanin er fýra ára gomul, at byggitíðin er longd við tveimum árum, og at serlig atlit eru tikin – hetta fyri at føroyskar byggifyritøkur og veitarar ikki skuldu verða verri stillað enn útlendskar fyritøkur.
Tað hevur ljóðað, at føroyska byggifyritøkur og veitarar hava verið sera misnøgd við arbeiðsháttin hjá Landsverki viðvíkjandi útboðstilfari.
Áhugavert verður at frætta, hvat Løgtingið sigur til tíðindini frá Landsverki um, at sama verkætlan kann gerast við at gjalda 20 prosent minni, uttan at hesar ganga út yvir byggilist, góðsku og funktionalitet.
Skal hetta skiljast so, at verkætlanin er gjørd 20 prosent dýrarari fyri at føroyskar fyritøkur skulu kunna vera við, og tá tað nú kortini bleiv ein útlendsk fyritøka, sum var lægst, so lækka vit bara prísin tilsvarandi?
Okkurt er, sum bendir á, at politisku skipanin tørvar meiri álítandi metingar, tá støða skal takast til stórar verkætlanin, og spurningurin er, um Landsverksstovnurin er førur fyri at átaka sær so stórar uppgávur, sum stovnurin av góðum grundum ikki hevur royndir í.
Tað bendir á eina amatørkenda mannagongd, sum kann kosta nógvar almennar milliónir.
