Fyri Javnaðarflokkin er katastrofan so stór, at um flokkurin ikki ger onkrar grundleggjandi broytingar her og nú, so kann hann tað sama pakka saman. Tað hevur so at siga bara gingið afturá hjá flokkinum, síðani Jóannes Eidesgaard tók við sum formaður. Hann megnaði í 1998 at knúgva flokkin upp úr díkinum frá 1994, men síðani hevur bara gingið aftur – og flokkurin hevur havt trý vánalig val á rað. Tað er ikki hent áður í søgu floksins, og sambært dagsins veljarakanning, so stendur flokkurin til at tapa fjórða valið – og tað verður ikki við mýkindum – hann stendur til at missa 6,4 prosent og tvey tingfólk.
Støðan hjá Javnaðarflokkinum er nógv verri í dag, enn tá Atli Dam í 1994 fekk alla skuldina einsamallur. Nógvar ferðir verri. Flokkurin er sambært veljarakanningini á stødd við Sjálvstýrisflokkin og Miðflokkin, meðan hann síðani 1936 hevur verið millum teir stóru flokkarnar. Í 1994 fór Javnaðarflokkurin í knús, tí at javnaðarfólk og fakfelagsfólk stovnaðu ein nýggjan flokk. Nú flýggja veljararnir mest til Sambandsflokkin, sum uttan at hava víst á úrslit ella gott politiskt handalag skúmar róman - helst við trygd í blokki og móðir Danmark.
At Fólkaflokkurin stendur fyri einum bakkasti er ikki so løgið. Flokkurin hevur júst mist ein av profilunum, og tveir av fremstu monnunum í flokkinum eru undir tí álvarsligastu ákæru, sum ein politikari kann fáa.
Tjóðveldisflokkurin kvinkar fram. Flokkurin hevur gingið oyðumarkargongd síðani hann gav fullveldissamgonguni mønustingin fyri sjey árum síðani. Og við einum miseydnaðum fullveldispolitikki verður helst trupult hjá flokkinum at vinna seg fram aftur í fremstu røð, men seigur er hann - og tykist megna at halda støðuna sum alternativið til stjórnarberandi flokkin. Hann tykist onkran stirðil hava, sum Javnaðarflokkurin og Fólkaflokkurin ikki hava.
Tað er ringt hjá Jóannes Eidesgaard at forklára seg úr støðuni. At skylda uppá, at tey ikki duga at selja boðskapin, tað gongur ikki - tað er ov býtt. Tað er sum tá Eik-stjórin umbar seg við, at hann hevði fylgt strategiini - og annars einki galið gjørt. Men for ólukkan. Strategiin hjá Eik var skeiv, eins og politikkurin hjá Javnaðarflokkinum er skeivur.
Trý vánalig val. Sjey søguliga vánaligar veljarakanningar. Er tað ikki nóg týðuligt tekin um, at nýggj fólk mugu á liðið?
