Eitt er, at føroyskir politikarar – við Tjóðveldinum á odda, hava skorið burtur blokkstuðulin – uttan at gera nakað sum helst fyri at útvega føroyska samfelagnum tilsvarandi – ella fleiri – inntøkur. Tað er vorðið sum politiskt handverk. Men sum ikki einaferð, so er tað »målet som helliger midlet« og við at kvetta blokkin á stokkinum, so fekk Tjóðveldi saman við Fólkaflokki, Sjálvstýrisflokki og Miðflokki sett hol á tilgongdina at loysa Føroyar úr ríkisfelagsskapinum.
Hest ein ætlan við góðum intentiónum, hóast tær ikki hava verið nóg væl umhugsaðar – og als ikki nóg væl undirbygdar.
Men treyðugt so. Tað vóru ikki bara teir fýra fullveldisflokkarnir, sum tóku undir við hesi ætlan. Tað sama gjørdu Sambandsflokkurin og Javnaðarflokkurin parvíst, tá teir skipaðu samgongu eftir at fullveldissamgongan kollsigldi í 2003. Javnaðarflokkurin og Sambandsflokkurin tóku so mikið undir við fullveldisætanini, at teir samdust við Fólkaflokkin um, at blokkstuðulin skal skerjast. Avrátt varð tí, at stuðulin ikki skuldi prístalsviðgerast, men standa í stað nominelt, soleiðis at hann í veruleikanum minkar í trá við inflatiónina.
Javnaðarflokkurin heldur tó fast við hesa støðu. Men løgmaður er dragnaður. Hann tekur nú undir við Edmundi Joensen, sum alt hetta valskeiðið hevur birt upp undir, at gongda leiðin – fyri at bøta um fíggjarvánirnar, er aftur at prístalsviðgera blokkin.
Argumentini eru góð nokk. Tað er løgtingið sjálvt, sum skal taka hesa støðu. Danir gjanlda fegnir.
Men tað er ikki serliga framtíðartryggjandi politikkur.
Vit hava á hesum stað fleiri ferðir eftirlýst einum greiðum boð upp á eina búskaparliga loysn fyri føroyska samfelagið. Vit halda, at øll, sum bjóða seg fram at stýra landinum eiga at hava eitt boð uppá, hvussu vit tryggja okkum búskaparliga næstu árini. Valið eigur at snúgva seg um búskap, um fólkavøkstur og hvussu vit framtíðartryggja vælferðarsamfelagið búskaparliga.
Javnaðarflokkurin er komin við einum boð upp á eina skattaumlegging. Sambandið vil hækka blokkstuðulin, meðan Tjóðveldi vil vaksa fólkatalið.
Ymisk sjónarmið. Okkurt ítøkiligt, okkurt afturlítandi og okkurt sum sápubløra...
Veljarin vil hava tó verulig boð.
