Nú ber loksins til hjá familjum við lágum inntøkum at søkja um familjuískoyti, aftaná at løgtingið fyri jól samtykti at seta í gildi lógina um familjuískoyti.
Familjuískoyti er ein fíggjarligur stuðul, sum verður veittur familjum við børnum, sum hava lágar inntøkur, og sum ikki hava ognir av týdningi.
Familjuískoytið er sett soleiðis saman, at stakir uppihaldarar við einum barni fáa 18.000 kr. um árið fyri fyrsta barnið, umframt 5.000 kr. fyri hvørt barni, sum er afturat tí fyrsta barninum. Hjá pørum við einum barni er familjuískoyti 22.000 kr. um árið, umframt 5.000 kr. fyri hvørt barni, sum er afturat tí fyrsta barninum. Fult familjuískoyti verður veitt teimum, sum hava árliga inntøku upp til 190.000 kr. um árið, og lækkar ískoytið stigvíst so hvørt, sum inntøkan hækkar.
Almannaverkið leggur dent á, at tað hevur týdning, at fólk søkja um stuðulin skjótast gjørligt, tí familjuískoyti verður útgoldið frá tí mánaði, ið umsóknin er móttikin.
Upplýsingar um, hvussu tú kanst søkja eru at finna á heimasíðuni hjá Almannaverkinum www.av.fo.
