Nú rennur Barcelona aftaná Madrid

Tað kom púra óvart á, at FC Barcelona hóskvøldið tapti á heimavølli móti Granada. Eftir eitt misjavnt kappingarár við nógv stríði uttanfyri vøll, so hevði FC Barcelona arbeitt seg í eina støðu, har liðið við einum sigri kundi leggja seg á odda í La Liga fyri fyrstu ferð í hesum kappingarárinum, eftir at bæði Atletico Madrid og Real Madrid settu stig til. Sevilla blandar seg eisini upp í við einum stigi færri enn FC Barcelona.

Tað kiksaði, sjálvt um Lionel Messi legði FC Barcelona á odda í dystinum. Í gjár byrjaði 34. umfar og bæði Atletico Madrid og Real Madrid vunnu sínar dystir. Bæði høvðusstaðarfeløgini máttu tó stríðast fyri sigrinum.

Atletico Madrid vann 1-0 á útivølli móti Elche. Marcos Llorente legði gestirnar á odda, eftir at Luis Suarez fyrr í dystinum hevði brent brotsspark. Í yvirtíðini fekk Elche brotsspark, sum Fidel Chaves sendi á stongina. Harvið heldur Atletico Madrid fast í oddasessinum í La Liga.

Real Madrid mátti eisini arbeiða hart í heimadystinum móti Osasuna. Ikki fyrr enn eitt korter fyri tíð fekk miðverjin, Eder Militao, hol á. Løtu seinni skoraði stríðsmaðurin á miðjuni, Casemiro, til 2-0, sum eisini bleiv úrslitið.

FC Barcelona skal í kvøld halda lív í meistaravónini í útidysti móti Valencia. Ein sigur er so gott sum eitt krav, tí komandi umfar spæla FC Barcelona – Valencia og Real Madrid – Sevilla. Øll kunnu vinna meistaraheitið. Sevilla fær í annaðkvøld vitjan av Atheltic Bilbao.