Einstakar leysar takplátur og skaðar á húsaklædningar. Soleiðis ljóðaðu skaðafráboðanirnar til løgregluna í vikuskiftinum. Hetta eru sera smáar skaðafráboðanir, tá ið hugsað verður um, hvussu ógvusligar skaðar aðrar ódnir hava ført við sær tey seinastu tíggju árini.
Norðoyggjar og Vágar harðast raktar
Hóast tann nógva vindin kring landið, so komu tær flestu skaðafráboðanirnar úr Norðoyggjum og úr Vágum.
Løgreglan í Klaksvík fekk um vikuskiftið boð um einar níggju stormskaðar. Men frá løgreglustøðini í Klaksvík verður sagt, at hesir stormskaðar ikki vóru av teimum ringastu. Stormskaðarnir hendu allir seinnapartin fríggjadagin og tíðliga leygarnáttina, og var talan í flestu førum um, at onkur takpláta ella eitt sindur av húsaklædningi vóru loysnað. Tó fekk løgreglan í Klaksvík eisini boð um, at ein hjallur í Norðdepli var um at fara á flog.
Sagt verður frá løgregluni í Klaksvík, at vindurin var ógvuliga harður, tá ið skaðarnir hendu, men at stormurin longu byrjaði at hasa av um eitt tíðina leygarnáttina.
Løgreglan í Vágum fekk seint fríggjakvøldið boð um, at tekjan á timburhandilinum hjá Handilsvirkinum Niclasen í Sørvági var í ferð við at ríva. Hóast ein partur av tekjuni reiv og takpláturnar fuku runt á keiðini, so eydnaðist tað monnum at forða tekjuni at ríva heilt.
Seinni fekk løgreglan í Vágum boð um, at ein lyktapeli var fokin um koll í Sørvági, og seinni fekk hon eisini boð um, at skorsteinurin hjá Føroya Banka í Sørvági var við at ríva. Bjargingarfelagið fekk tó styrkt um skorsteinin, so at hann ikki datt.
Hóast Norðoyggjar og Vágar vórðu harðast raktar av stormskaðum, hendu eisini stormskaðar aðrastaðni í landinum fríggjadagin, hóast talið av teimum ikki var tað heilt stóra. Í Syðrugøtu byrjaði takið at ríva á einum bygningi hjá P/F Vón ovalaga í bygdini, men skjótt varð atborið við at festa tekjuna aftur. Í syðrugøtu hendu eisini aðrir stormskaðar. Millum annað feyk ein takpláta av einum húsum á ein bil, ið av hesum fekk rættuliga stóran skaða. Eisini hendi tað, at tveir bilar, ið stóðu parkeraðir við síðuna av hvørjum øðrum fingu skaða, tá teir vórðu lytir uppfrá av einari meldurhvirlu. Annar av bilunum fór nærmast í sor. Harafturat fingu fleiri húsaklædningar og fleiri bilar skaða av steinstøkkum.
Eisini í Havn hendi onkur smærri stormskaði fríggjadagin. Talan var um, at ein rútur varð sogin úr einum bussi hjá Bussleiðini í Havn og eisini úr handilsbygninginum hjá Køksmiðstøðini á Hálsi. Harafturat tók ein tekja at ríva úti við Velbastaðvegin, men varð hendan nelgd aftur beinanvegin, so at einki meira hendi.
Ikki bert stormskaðar
Hóast tann nógva stormin, hevur løgreglan ikki bert havt stormskaðar at tikist við um vikuskiftið. Sera hált hevur verið, og tí eru onkur smærri ferðsluóhapp hend kring landið. Fríggjadagin hendu tvey smærri ferðsluóhapp, ið bert høvdu materiellan skaða við sær. Við Skálafjørðin hendi eisini eitt lítið ferðsluóhapp fríggjadagin, orsakað av hálku. Somuleiðis fek løgreglan í Vágum eisini boð um nøkur smærri ferðsluóhapp, ið vóru hend, orsakað av teirri álvarsligu hálkuni fríggjadagin.
Løgrglan í Havn sigur, at onnur smærri ferðsluóhapp eisini eru hend í Havn fyrr í vikuni, orskað av hálku. Mikudagin hendi eitt ferðsluóhapp uttanfyri skúlan í Hoyvík. Talan var um ein bil, ið gleið á ein annan í brekkuni niðan til skúlan.
Aftur teimum smærru ferðsluóhappum, hevur løgreglan eisini havt annað at gera um vikuskiftið. Í Klaksvík varð ein bilur stolin leygarkvøldið. Bilurin kom afturíaftur, men tó ikki í sama standi, sum tá hann varð stolin. Bilurin hevði fingið væl av skøvum og buglum ymsastaðni, orsakað av skilaleysari koyring.
Løgreglan í Havn fekk leygardagin boð um, at ein bilur var farin út av Marknagilsvegnum. Førarin á hesum bilinum varð skuldsettur fyri rúsdrekkakoyring. Seinni leygardagin fekk løgreglan boð um, at hervark var framt á nakrar bilar á Fugloyarvegnum og á Grønlandsvegnum. Eisini varð løgreglan boðsend, tí ungligar høvdu kynt bál í Bókbindaragøtu, men tá løgreglan kom á staðið var bálið sløkt. Seinni fekk løgreglan boð um, at innbrot hevði verið í handlinum hjá Katrinu Kritiansen, og um náttina varð løgreglan boðsend at koma at basa bardaga í klubbagarðinum.
Í Vágum varð tvær ferðir sent boð eftir løgregluni at koma at basa húsaófrið um vikuskiftið.
Løgreglustøðirnar aðrastaðni kring landið boða frá einum góðum og friðarligum vikuskifti, við ongum stormskaðum og ongum harðskapi.
