Styrki
Tann 10. oktober er dagurin, tá sterkasti maðurin í landinum skal finnast.
Og líkt er til, at tað eru fleiri, sum hava hug at vita, um júst hann er maðurin, ið skal lyfta arvin eftir Regini Vágadal, sum hevur vunnið kappingina, tær ferðirnar hon varð fyriskipað, tó at tað nú eru eini 10 ár síðani, at kappast varð seinast.
Nógv kilo at lyfta
Regin verður sjálvur dómari, tá sterku menninir um hálvan annan mánað fara at lyfta, dragsa og toga seg fram móti heitinum, og longu nú fyrireika luttakararnir seg við fullari ferð.
Hetta gongur fyri seg í høllini hjá Havnar Timburhandli, har teir hava fingið loyvi at seta útgerðina til ymsu kappingarnar. Í einum horni liggja nakrir 100 kilo tungir sandsekkir, sum stkjóast gjørligt skulu tveitast upp á seks plattar, sum eru stáplaðir oman á hvønnannan.
Aðrastaðni liggur ein 60 kilo tung stamma úr jarni, har til ber at festa vektir, soleiðis at hendan vigar tey avtalaðu 90 kilo’ini, sum skulu lyftast upp um høvd, so ofta sum orkan nú er til tað.
Eisini er eitt 20 kilo tungt bildekk, sum skal haldast í strektum armum, meðan tvær bobbens upp á 105 skulu haldast uppi frá gólvinum longst gjørligt.
Eftir eru kappingarnar í benchpress – sum kann venjast í vanligari venjingarmiðstøð – og kappingin við at flyta ein bil. Og henni ber ikki so væl til at hýsa í venjingarhølunum.
Skaðar koma
Útgerðin er sett upp, soleiðis at menn longu nú kunnu venja teknikkir og annað, men tað er tó ikki so, at menn hittast fleiri ferðir um vikuna og taka øll elementini ígjøgnum.
- Tað ber slettis ikki til. Fyri tað mesta venja vit í Yndi, men vit royna at hittast her eina ferð um vikuna at taka nakað av kappingarskránni ígjøgnum. Men tað er ikki hugsingur um at vit taka alt ígjøgnum í senn, sigur Bogi Hammer, sum er ein av luttakarunum og fyriskiparunum av kappingini.
- Til kappingina leggja vit sjálvandi nógv meira fyri. Alt skal gjøgnumførast upp á einar 2-3 tímar, og tað er eingin sum helst ivi um, at onkur skaði verður hjá summum luttakarum. Og eg kann vissuliga staðfesta, at eingin venjing verður á skránni dagin eftir kappingina, sigur Sámal Johannis Hansen, sum eisini er ein av luttakarunum.
Tosa um teknikk
Meðan myndamaðurin og útsendi blaðmaðurin eru í venjingarhølunum, verður tikið á við nøkrum av kappingaramboðunum. Og tosað verður nógv um, hvussu tú best fært gjøgnumført ymsu kappingarnar. Onkrir av sandsekkunum viga eitt sindur oman fyri 100 kilo, so næsti setningurin verður at fáa nakað av sandi úr hesum. Og eisini er týdningarmikið, at sekkirnir eru stramt bundnir, soleiðis at tað er lættari at fáa tak á.
Stamman – ella bulurin – sum skal lyftast upp um høvd oftast gjørligt, er eisini eitt sindur trupult at fáast við. Talan er um svera rammu í stáli, og tí er ikki bara at siga tað at halda javnvágini, samstundis sum lyft verður, so eisini hetta verður nakað av tíð brúkt uppá.
Hinvegin eru dekkið og lyftið av bobbens heldur meira beinleiðis rástyrki, og tí snýr restin av prátinum í høllini seg heldur um bilin, og hvussu tað man vera at fáast við hendan.
Stórur áhugi
Tá farið varð undir at fyrireika kappingina, vistu menn ikki reiðiliga, hvussu áhugin fór at verða fyri hesum.
Men nú tað av álvara stundar til, tykist luttakaratalið at koma heilt nær teimum 10.
Umframt Boga Hammer, sum stendur fyri størsta partinum av fyrireikingunum, telur listin Sámal Johannis Hansen, Jákup Petur Djurhuus, Finnur Poulsen, Høgni av Reyni, Herluf Vilhelm, Bárðru Poulsen og Heri Vestergaard. Hartil hava nakrir mans verið og roynt útgerðina, og tað er ikki heilt óhugsandi, at onkur av hesum eisini teknar seg til kappingina.
- Og sjálvandi vilja vit hava, at talið av luttakarum er so stórt, sum tað er gjørligt. Er onkur sterkur sumbingur, sum heldur seg kunna taka okkum, skal hann sjálvandi vera vælkomin eisini, sigur Bogi Hammer við einum skeivum smíli.
