? Eg eri ógvuliga fegin um, at mítt arbeiðið sum sjónvarpsmaður verður virt sum mentan. Tað er ógvuliga fløvandi, at fáa slíka virðisløn, segði Zacharias Hammer, sum annars segði seg hava torført við at seta orð á kenslurnar við eitt slíkt høvi.
? Myndatólið hevur altíð verið mín besti blýantur, segði Zacharias í takkarrøðuni.
Nevndin segði í grundgevingini fyri at hava givið honum virðislønina, at Zacharias hevur við sjónvarpssendingum sínum givið hyggjarum innlit í fjølbroytta livihátt føroyinga.
Við frá byrjan
Zacharias Hammer hevur verið við í Sjónvarpi Føroya heilt frá byrjanini. Fyrst í 1979 við Sjónvarpsfelagnum og síðani í almenna sjónvarpinum, sum varð sett á stovn í 1984.
Hann hevur seinastu árini verið í farloyvi, har hann hevur siglt úti við ymsum skipum, og hóast hann hevur verið sjómaður, so hevur hann eisini gjørt sendingar frá sínum túrum. Nú arbeiðir hann aftur í sjónvarpinum, og tað er hansara lívsstarv, sigur hann sjálvur.
? Eg var heppin at vera við frá byrjan í sjónvarpinum, og eg eri takksamur fyri møguleikan, eg havi fingið, at vísa føroyingum tann stórsligna urtagarð, sum vit eiga her, segði Zacharias í røðuni.
Hann legði tó afturat, at einsamallur hevði hann ikki fingið nógv av skafti, og hann vildi fegin luta heiðurin við teimum, hann hevði arbeitt við í sjónvarpinum hesi mongu árini.
At enda segði kendi verturin, at sjónvarpið er sum ein knívur. Hann kann vera nýttur til gott og ilt. Tí hava fjølmiðlafólk eina stóra ábyrgd at bera reint og satt tilfar.
Barnasendingar
Zacharias Hammer hevur seinastu árini lagt seg eftir at gera náttúrusendingar, har hann fer við til bjarga og onnur støð, har eingin sjónvarpsmaður fyrr hevur hættað sær at farið.
Tað er fyrst og fremst hesar sendingar, sum hann hevur fingið virðisløn fyri.
Hann stóð eisini fyri barnasendingunum í sjónvarpinum í fleiri ár. Hvør minnist ikki Gyðu og Grana, fjørutrøllið í Fugloy, dølgarnir frammi við Gjónna og hinar jólaløturnar, tá smábørnini sótu sum límað til skermin.
Tey flestu í sjónleikarhúsinum vóru á einum máli um, at tað var rætt at lata Zachariasi virðislønina, sum er 20.000 krónur. Rigmor Restorff fekk hesa virðislønina í fjør.
