Valnevndin í Uganda kunngjørdi í dag, at forsetin, Yoweri Museveni, varð afturvaldur á valinum fríggjadagin. Sambært valnevndini fekk Museveni 68 prosent av atkvøðunum, meðan tann harðasti kappingarneytin, Kizza Besigye, fekk 26 prosent.
Kizza Besigye vil ikki viðurkenna úrslitið, men heldur uppá, at myndugleikarnir hava framt umfatandi valsvik. Eitt nú verður forsetin lagdur undir at hava goldið fólki almennar pengar fyri at fáa tey at atkvøða fyri sær.
-Eitt val av hesum slagnum sigur ikki fólksins vilja. Eg viðurkenni ikki úrslitið, og eg viðurkenni heldur ikki leiðaraevnini hjá Museveni, sigur Kizza Besigye.
Fleiri evropeiskir eygleiðarar hildu eyga við valinum, og teir siga, at í høvuðsheitum var alt, sum tað eigur at vera.
