Í dag klokkan 16 verður minningarhald fyri deyð børn í Havnar Kirkju, har Sverri Steinhólm, prestur, prædkiar, og Jens Marni Hansen luttekur við sangi og tónleiki
1. novembur er, sum øllum kunnugt Alla Halganna dagur. Flestu kirkjurnar í Føroyum minnast hendan dagin tey fólk, sum doyðu á sjónum í farna árinum.
Felagið Pinkubarnadeyði, sum tó ikki er til longur, tók stig til slíka minningartgudstænastu fyri deyð børn á fyrsta sinni í november í 1997.
- Undirtøkan var so góð, at vit valdu at gera hetta sum ein vakran og afturvendandi sið, har øll kunnu minnast deyða barn sítt ? óansæð nær og í hvørjum sambandi barnið er deytt. Hóast felagið ikki er aktivt longur, vilja vit virka fyri at gudstænastan í november altíð verður ein fastur siður, siga fyrireikararnir.
- Vit vita, at tá ið vit missa eitt barn, missa vit ein part av okkum sjálvum. Ein part av okkara framtíð, ein part av okkara samleika. Vit náddu at knýta sterk bond til børn okkara, annaðhvørt tey vóru fødd ov tíðliga, til tíðina ella vit hava livað saman við teimum, sigur Annvør Nielsen, sum er ein av fyrireikarunum.
Saman við børnunum í familjuni ? tey sum vóru og tey, sum eru komin ? minnast vit tey deyðu børnini við einum dámi av góðsemi og fløvan. Einum siði við ritualum, ið er við til at binda bond ímillum fortíð og framtíð.
Minningarhaldið verður Alla Halganna sunnudag 8. november klokkan 16 í Dómkirkjuni, har Sverri Steinhólm, prestur prædikar. Jens Marni Hansen luttekur við sangi og tónleiki.
Minningarhaldið verður sum ein vanlig gudstænasta. Tað verður møguleiki hjá teimum, sum hava hug til tess at tendra eitt ljós, fyri tí barnið, ið farið er.
Í dag liva vit í eini mentan, har vit dagliga skulu vísa skjótleika og framfýsni, sum prógv uppá, at vit liva lívið til fulnar. Vit geva okkum ikki stundir at dvølja og sansa. Henda sterka kenslan av felags lagnu, gevur bæði foreldrum og avvarðandi stundir til at minnast børnini, ið fingu eitt alt ov stutt lívsskeið.
Tá ið vit tendra ljós í kirkjuni fyri børnum okkara, er tað eitt tekin um kærleika og at børn okkara enn lýsa í hjørtum foreldranna.
Aftan á gudstænastuna verða øll boðin til ein drekkamunn í Perluni í Tórsgøta millum Reinsaríið og Miðlahúsið.
Møguleiki verður fyri at tosa um áhugi er millum manna at endurstovna felagið Pinkubarnadeyði.
