Fiskivinna
Nú svartkjaftakvotan er so nógv skerd, og lítil fiskur er at býta ímillum skipini í føroyskum sjógvi, kann allur bati bøta hjá nótaflotanum.
Ein bati, sum nótamenn seta sínar vónir til, er ein komandi lodnukvota í Barentshavinum.
Men tað verður eftir øllum at døma ikki í ár, at ein slík kvota kemur at fáa týdning fyri henda skipabókin.
Ikki í ár
Tá samráðingar vóru við russar um sínámillum fiskiveiðirættindi, høvdu føroyskir nótamenn vónir um, at føroyingar longu í ár fóru at fáa lut í lodnukvotuni í Barentshavinum, nú lodnustovnurin eystanfyri byrjar at koma fyri seg aftur.
Men hetta eydnaðist ikki við seinastu samráðingar við russar, og neyvan fer tað at eydnast í avtaluni við norðmenn heldur.
Kristian Martin Rasmussen, reiðari, sigur, at tvey tey fyrstu árini, teir høvdu Norðborg, høvdu teir tvey góð fylgjandi ár, har lodnan í Barentshavinum hevði stóran týdning.
- Lodnan varð fryst til matna, og vit høvdu japanesar umborð at leggja okkum lag á. Skjótt minkaði lodnustovnurin burtur í einki, og fiskiskapurin helt uppat.
Hann vísir á, at eingin lodna av týdningi er fiskað í Barentshavinum seinastu árini, men nú er líkt til, at stovnurin er komin hampiliga væl fyri seg aftur.
- Nú er veiðan so tikin uppaftur, og vit vóna, at vit sum frá líður fara at fáa lut í kvotuni.
Kristian Martin vísir á, at tá samráðingar vóru við russar fyrr í vetur, høvdu nótamenn vónir um at fáa eini 4000-6000 tons í okkara part.
- Hetta eydnaðist ikki hesaferð, men vit hava vónir um, at vit til samráðingarnar næstu ferð fara at fáa lut í kvotuni, leggur hann aftrat.
Reiðarin sigur, at ein lodnukvota í Barentshavinum kundi havt stóran týdning fyri eitt nótaskip sum nýggju Norðborg, sum kemur til várs.
Lodna í Íslandi
Í íslendskum sjógvi eiga føroysku nótaskipini 5% av heildarkvotuni – ella í mesta lagi upp til 30.000 tons av kvotuni.
Íslendskir myndugleikar hava verið trekir at latið føroysk skip frysta lodnuna umborð, serliga í tíðarskeiðinum rundan um 20. februar, tá teirra egnu skip í einum stuttum tíðarskeiði plaga at veiða rognalodnu til japanska marknaðin.
- Men hetta sleppa vit nú, og í fjør gjørdu vit ein túr um hetta mundið. Vit fingu 800 tons, sum góvu millum 6-7 krónur fyri kilo. Tað gekk ikki heilt, sum vit vildu, men hampiligt kortini.
Meðan onnur føroysk nótaskip hava landað lodnu til frystingar í Íslandi, frystir Norðborg lodnuna umborð.
Kristian Martin Rasmussen sigur seg vóna, at landsins myndugleikar fara at hugsa um tey feløg, sum hava gjørt stórar íløgur í pelagisku vinnuna, tá teir fara at býta restina av svartkjaftakvotuni út til skipini.
