Flest øll seks ára gomul - t.e. eini 90-95%, hava sítt dagliga virksemi á dagstovnum ella dagrøkt. Á dagstovnunum kring landið hevur hesin aldursbólkurin, sum oftast, serliga støðu á stovninum. Skipað verður fyri “skúlabólki” ella líknandi. Hesir skúlabólkarnir hava í sínum virksemi tað skúlafyrireikandi arbeiðið um hendi, og er tað í flestu førum vælvirkandi.
Tað góða við hesari skipan er, at børnini framvegis sleppa at vera børn og skulu ikki náa enum ávísum “pensum”.
Ein trupulleiki er helst, at dagstovnar verða kallaðir dagstovnar og hava ikki orðið skúli tengt at sær, tískil halda fólk kanska, at tey einki læra meðan tey ganga á stovni. Og tá skal sigast, at eingin námsfrøðingur við virðing fyri sær sjálvum, sínum arbeiði ella børnunum, ikki roynir at gera sítt til, at børnini verða so væl fyri sum gjørligt, tá tey fara í skúla.. Hetta verður gjørt við at stimbra teirra persónligu og sosialu førleikar.
Sum er, er skipanin tann, at børn skulu í skúla tá ið tey eru sjey ár. Skúlin tykist at hava trupulleikar og í staðin fyri at loysa teir trupulleikar, ið har eru, verður farið í holt við at broyta dagstovnaskipanina, ið tykist at virka. - Undarligt í mínari verð –
Fyrsta stigið, áðrenn farið verður í holt við forskúlar, eigur tí at verða at bøta um viðurskiftini hjá børnunum og skúlanum tey fyrstu skúlaárini. Aðrastaðni rundan um okkum, eru tey farin í holt við at seta tvílæraraskipanir og líknandi í verk, og er spurningurin, um hetta ikki eigur at verða viðgjørt nærri í Føroyum.
Sjálvandi kann eitt meira miðvíst fyrireikandi arbeiðið fara fram á dagstovnunum, og er tað eisini byrjað sambært kunngerð til Dagstovnalógina í 2006, har tað stendur: § 3. Dagstovnurin eigur at seta orð á, hvørji námsfrøðilig mál eiga at vera nádd fyri hvønn aldursbólk av børnum, og hvussu hetta skal setast í verk.
Henda kunngerð er so mikið nýggj, at ikki ber til, at siga hvørja ávirkan hon hevur havt enn, tó er tað vælhugsandi, at hetta fer at gera dagstovnaarbeiðið sjónligari og miðvísari. Mentamálaráðið hevur sett nakrar royndarbólkar, ið skulu gera námsætlanir fyri m.a. dagstovnaøkið.
Hetta sigur mær so mikið, at forskúlarnir tola væl at bíða, tí enn restar ein lýsing um, hvat innihaldið á einum dagstovni eigur at vera, og hvussu hetta arbeiði skal skipast. Tí, sum tað ljóðar, skulu færri fólk vera um hesi seks ára gomlu í einum forskúla enn á einum dagstovni. Tá ljóðar hetta meira sum ein sparing, enn sum ein roynd, at skipa viðurskiftini betur fyri henda aldursbólk. Eg dugi eisini at síggja, at foreldragjaldið á dagstovnum, eisini kann verða viðvirkandi til, at foreldur heldur vilja, at børnini skulu í forskúla enn á dagstovn, tá hetta fyri tey verður ein bíligari loysn. Enn havi eg so ikki hoyrt nakað um ein kostnað fyri forskúlan.
“Hastverk er lastverk” er eitt hugtak, ið rennur mær í hug.
