Álitið má endurreisast

Ingolf S. Olsen

Politiski tubulensurin rund­an um Ferðaráðið ella Visit Faroe Islands seinastu nóg­vu árini hevur sett so djúp sár í álitið á politisku skipan­ina, tá tað snýr seg um hand­far­ingina av ferða­vinnu­ni, at nærum alt, sum kann bøta um hetta, má fáa góða mót­tøku.
Tað heldur Bjørt Samuel­sen, vinnupolitisk fram­søgu­kvinna hjá Tjóðveldi, og hon heldur tískil eisini, at tað er í lagi at skipa Visit Faroe Is­lands sum eitt alment parta­felag, um tað er tað, sum skal til.
- Alt, sum kann vera við til at endurreisa álitið, er eitt stig á rættari leið, men sjálvsagt eru fleiri iva­spurn­ingar, sum eg eisini fari at gera mítt til at fáa reist, tá hetta uppskotið kem­ur fyri í tinginum. Millum ann­að hevur tað fyrr elvt til kjak í politisku skipanini, um tað er rætt at brúka eina parta­felags­konstruksjón, tá tað snýr seg um at skipa virksemi, sum ikki í sær sjálvum skal hava vinning. Hetta mugu vit kan­na og viðgera og sjálvsagt seta í mun til teir fyrimunir og vansar, ið kunnu verða, sig­ur hon.

Farvæl innlit
Hon sigur, at tað smakkar henni illa at skula siga farvæl til møgu­leik­an hjá miðlunum og øðrum áhugaðum at biðja um alment innlit í um­sit­ing­ina av ferðavinnuni, tá Visit Faroe Islands er vorðið al­ment partafelag.
- Men her vigar tað meira, at stovnurin verður skildur frá politisku skipanini, tí søgan er so ræðandi. Síða­ni mugu vit hava álit á, at stovnurin sjálvboðin fer at virka eins opið og gjøgn­um­skygt, sum hann nú skal gera sambært lógini um alment inn­lit. Tað ber jú eisini til at seta reglur um alment inn­lit í lógina um almenna parta­felagið.
- Annars haldi eg, at Visit Faroe Islands hevur nøku­lun­da sama leiklut í mun til ferða­vinnuna, sum almenna parta­felagið Fiskaaling hev­ur í mun til alivinnuna, og har má eg siga, at tað hevur rigg­að væl, sigur Bjørt Samuel­sen.

Sjálvverja
Hon kann tó ikki lata vera við at undrast á, at hetta stigið verð­ur tikið av júst hesari stjórn­ini.
- Høvuðsgrundgevingin er jú at sleppa Visit Faroe Is­lands undan óstabiliteti veg­na politiskum turbulensi. Við øðrum orðum vil Johan Dahl nú við lóg verja ferðavinnuna móti sær sjálvum. Men tað er eisini upp á sítt pláss, tí tað vóru nøkulunda teir somu sum nú, ið ráddu, tá Ferðaráðið fyrst varð av­høvdað fyri at geva rúm fyri Samvit, sum síðani eisini varð avhøvdað, so vit í trý ár als onki ferðaráð høvdu, sig­ur Bjørt Samuelsen.