Benedikt pávi 16. hevur biðið sína umsiting kanna, hvussu tað ber til, at italskir fjølmiðlar hava fingið fatur á loyniligum skjølum hjá Vatikaninum.
Giovanni Maria Vian, sum er ein av næstu ráðgevum pávans, segði í gjár, at pávin hevur givið boð um eina so umfatandi kanning, at hon umfatar hvønn krók í leiðsluni í Vatikaninum. Erkabiskupurin Angelo Becciu hevur fingið til uppgávu at standa fyri kanningini, og hann verður vanliga mettur sum tann triðovasti embætismaðurin í Vatikaninum.
Skjølini, sum bløð í Italia hava endurgivið, snúgva seg millum annað um tiltøk ímóti korrupsjón í Vatikaninum og viðgera virksemið hjá bankanum, sum Vatikanið hevur, og hjá kardinalinum Tarcisio Bertone, skrivar AFP úr Rom.
