Sambært Heðini Mortensen er støðan hjá teimum gomlu í høvuðsstaðnum ikki nóg góð, men tað er ikki nakað kommunan skal lastast fyri.
- Eg standi fast við alt tað sama, sum eg segði í gjár, at tað er landið, ið hevur ábyrgdina av eldraøkinum, vísir Heðin Mortensen á. Tó fer hann heilt skjótt á fund við Rósu Samuelsen um støðuna.
- Kommunan hevur verið í samskifti við almannamálaráðið, og Rósa Samuelsen fær eina uppringing frá mær aftur í dag. Vit mugu set okkum saman at finna alternativar loysnir, og har má heimarøktin koma allarfyrst, tí hon kann loysa akuttar trupulleikar, sigur Heðin Mortensen.
Droppa gølubygning
Heðin Mortensen er sannførdur um, at tað mugu alternativar loysnir til nú trupulleikin er blivin so stórur. Hinvegin dámar honum framvegis onki alternativu loysnina at keypa bygningarnar undir Gráasteini.
- Tað tekur tíð at byggja búpláss, og vit vita á ongan hátt, um hasir bygningarnir undir Gráasteini nakrantíð verða góðtiknir, sigur Heðin Mortensen.
Hava pening til alt annað
- Nú havi eg eisini eina áheitan frá eldraráðnum í hondini, og tí stendur støðan hjá okkum sterkari, sigur Heðin Mortensen. Hann leggur afturat, at hann heldur tað vera undarligt, at landið hevur ráð til at byggja tunlar og so framvegis, tá teir ikki vilja prioritera eldraøkið.
Spurdur hví Tórshavnar kommuna ikki hevur gjørt nakað sjálv, tá aðrar kommunur í landinum hava gjørt so nógv burturúr eldraøkinum heldur Heðin Mortensen fast við, at hetta ikki er ein uppgáva, sum kommunurnar juridiskt sæð onga ábyrgd hevur av.
- Tað vísir seg sum, at landið vil hava allan avgerðarrættin, meðan kommunurnar skulu bera allan kostnaðin, sigur borgarstjórin í Havn.
