Á aðalfundinum hjá Føroya Lærarafelag 26. apríl er eitt nú val til nevndina á skránni. Formaður og tveir nevndarlimir standa fyri vali. Nevndarlimirnir, sum standa fyri vali, eru Jona Højsted og Bergur Samuelsen umframt formaðurin, sum seinastu seks árini hevur verið Jacob Eli S. Olsen. Freistin at bjóða seg fram sum formansvalevni og nevndarlimavalevni er 5. apríl klokkan 10.00. Hetta skal boðast skrivstovu felagsins skrivliga.
Aðalfundurin, sum verður á Hotel Føroyum, byrjar klokkan 10.00 við morgunmati. Gestarøðarar í ár eru Djóni Nolsøe Joensen, landsstýrismaður við barna- og útbúgvingarmálum, og Steinbjørn Hardlei, leiðari á Barnaverkætlanini hjá Barna- og útbúgvingarmálaráðnum. Formaðurin í íslendska lærarafelagnum KÍ, Magnus Magnús Þór Jónsson, er heiðursgestur á aðalfundinum. Hann flytur eisini fram røðu.
Á fimta sinni verður Veðurlagsvirðisløn Føroya Lærarafelags kosin og handað á aðalfundinum. Veðurlagsvirðislønin er samstarv millum Føroya Lærarafelag, Petri Pensjón og FNU (Føroya Náttúru- og Umhvørvisfelag). Vinnarin fær eitt heiðursbræv og har aftrat 25.000 krónur. Í ár verður tað Bjarni Prior, borgarstjóri í Vága kommunu, sum handar vinnarunum heiðursbrævið. Vága kommuna hevur verið slóðbrótandi við at seta børn og ung á skránna og hevur sjósett eina verkætlan í samstarvi við Fróðskaparsetur Føroya, ið skal økja um burðardygga framleiðslu av grønmeti, frukt og øðrum plantuvøkstri; børnini eru við í hesum arbeiði.
Síðsta á skránni á aðalfundinum er eisini árligi limafundurin í Stuðulsgrunni Lima Føroya Lærarafelags, skrivar Skúlablaðið á heimasíðu síni.
