Tað er byggifelagið HVT (fyrr Húsavarðatænastan, sum gjøgnum felagið P/F Frants Restorff eigur gamla bommvirkið hjá P/F Frants Restorff, har skeinkistaðið Taboo hevur hildið til seinastu árini. Remy á Kamarinum, sum rekur skeinkistaðið, slapp ikki inn, tá hann skuldi fara til arbeiðis har gjármorgunin. Lásini vórðu skift í hurðunum.
Tað er eigarin, sum hevur skift lásini og sett upp hegn frammanfyri, so tað ikki slepst til dyrnar.
– Teir hava roynt at fingið okkum út, men vit hava ein sáttmála, sum er galdandi til 2029. Vit hava leigað her síðani 2019, og vit vilja ikki víkja frá sáttmálanum uttan víðari, sigur Remy á Kamarinum.
Hann sigur, at samráðingar hava verið millum partarnar, og hann fekk einaferð bjóðað endurgjald og nýggj høli at vera í, umframt at hann fekk boðið at fáa leigumál aftur í nýggja bygnigninum, sum eigarin ætlar at byggja á staðnum.
Men tað spurdist einki burturúr. Í staðin hevur eigarin roynt ymsar snildir at slíta sáttálan og lagt leigarin undir at hava mishildið sáttmálan, sum er einasti møguleiki at fáa leigaran út, um teir ikki semjast um tað.
##med2##
Men Remy á Kamarinum sigur, at hann hevur ikki mishildið sáttmálan, og at leigan verður altíð rindað til tíðina. Eigarin hevur síðani lagt hann undir at hava gjørt ymiskt, so sum at bygt terassu á økinum uttan loyvi frá eigaranum.
– Men eg havi onga terassu bygt. Tað gjørdi undanfarni eigarin, so hatta heldur yvirhøvur ikki, sigur Remy á Kamarinum.
Hann sigur, at advokatur hansara nú er á málinum, og at tey fara at royna at fáa tað í rættin fyri at verja síni rættindi.
– So nú veit eg ikki míni livandi ráð, sigur Remy á Kamarinum, sum kennir tað sera undarligt soleiðis at verða tveittur á dyr og ikki sleppa inn eftir sínum ognarlutum.
– Tað er ein orsøk til, at tú hevur ein langan sáttmála. Vit hava gjørt íløgur, sum eru gjørdar í mun til tað, at vit kundu vera í hølunum í 10 ár, so hetta kennist sera órættvíst, sigur Remy á Kamarinum.
Vit hava spurt stjóran í HVT, Regin Petersen, hví hann hevur skift lásini. Men hann vil ikki svara. Vit spurdu eisini, hví hann ikki virðir ein sáttmála, sum gongur fram til 2029, men hann vil ikki svara.
– Eg havi onga viðmerking til hatta, er einasta svarið vit fingu frá honum.
##med3##
