Tað er nakað síðani, at tað varð boðað frá, at eisini Løgtingið verður sent til húsar. Tað er ikki bara fyri at forða fyri at korona breiðir seg, men eisini fyri at verja tinglimir ímóti at fáa smittuna, tí verða løgtingslimir smittaðir, verður lóggevandi valdið sett út av spælinum.
Sostatt verður tingið bara samankallað um so er, at mál taka seg upp, sum eru bráðneyðug.
Men fyri at tryggja at vit altíð hava eitt arbeiðsført lóggávuvald, hevur formansskapurin gjørt av at allir teir 33 tinglimirnir skulu so ikki møta á Løgtingi.
Hetta er neyðugt fyri at verja fyri, at alt Løgtingið verður sent í sóttarhald eftir ein tingfund tí at tað vísir seg, at onkur av tinglimunum hevur fingið smittuna.
Men møtir tingið á tingfundi í einari skerdari útgávu, kunnu aðrir tingmenn verða tøkir seinni, skuldi tørvur er á tí.
Tað var galdandi í gjár, tá ið Løgtingið samtykti hjálparpakkan til vinnulívið og til løntakarar. Tá vóru 19 tinglimir til staðar. Verður Løgtingið kalla saman aftur, verður sama mannagongd faldandi, men tá kunnu tað vera 20 tinglimir til staðar.
– Á hendan hátt kann sum frægast bindast um heilan fingur, eins og smittuvandin við tingfundi minkar, sigur formansskapurin í Løgtinginum í eini fráboðan.
Eftir lógini skulu minst 17 tinglimir vera til staðar fyri at Løgtingið skal vera viðtøkuført.
Og tí hevur formansskapurin gjørt av at skerja allar flokkarnar, alt eftir, hvussu nógv tingfólk tey hava.
Einasti flokkur, sum framhaldandi verður fullmannaður, verður sjálvstýrið, tí flokkurin hevur bara eitt umboð á tingi.
Men annars er avgerð tikin um, at verður tað neyðugt at kalla Løgtingið saman í hesi undantaksstøðuni, vit eru í, verða tað bara 20 tinglimir av teimum 33, sum møta á tingfundi. Hinir 13 tinglimirnir verða sostatt heima.
Tað merkir, at flokkarnir verða umboðaðir soleiðis:
– Fólkaflokkurin 5 umboð
– Sambandsflokkurin 4 umboð
– Javnaðarflokkurin 4 umboð
– Sjálvstýri 1 umboð
– Tjóðveldi 4 umboð
– Framsókn 1 umboð
– Miðflokkurin 1 umboð
Formenninir í tingbólkunum í teimum ymsu flokkunum, gera sjálvir av, hvørji tingfólk skulu umboða teirra flokk, og geva hinum boð um at verða verandi heima.
Eftir hesi samansetingini vísir tað seg, at samgongan fær ikki meiri enn 10 tinglimir, ella helvtina av tinglimunum, og sostatt hevur samgongan ikki meirilutan, tí til tað krevst, at hon hevur ellivu tinglimir. Kortini hevur Kristin Michelsen, tingmaður fyri Sjálvstýri, boða frá at hann er sinnaður at stuðla samgonguni.
Samstundis verður umsitingin í tinginum eisini verður skerd til fundin av somu orsøk.
