Tað vísir í øllum førum skriving hjá formanninum í Føroya Lærarafelag, Herálvi Jacobsen, í Skúlablaðnum.
Hann heldur fyri, at Føroya Lærarafelag kanska átti at skipað eina kapping við virðisløn til tann, sum í Skúlablaðnum finnur onkra niðurgering av dagstovnaøkinum og starvsfólkunum har:
– Og virðislønin kundu saktans verið høg, tí vit eru fullvís í, at eina slíka niðurgerðing av starvinum hjá einum, ikki ólíkum starvsbólki, finnur tú ikki í málgagni Lærarafelagsins. Neyvan hevði tað verið líka skilagott hjá Pedagogfelagnum at skipað slíka kapping, sigur Herálvur Jacobsen.
Hann sipar til eina grein á heimasíðuni hjá Føroya Pedagogfelag.
At tað er kapping millum pedagogar og lærarar – ella millum barnagarð og forskúla, eru tað eisini onnur viðurskifti, ið benda á. Bæði Tórshavnar kommuna og Skúlin á Argjahamri lýstu við fundi fyri foreldur, sum var á Skúlanum á Argjahamri hóskvøldið klokkan 19. Men tað var ikki einasti møguleiki, sum foreldur at seks ára gomlum høvdu at kunna seg, tí Dagstovnurin á Hamrinum á Argjum lýsti til fundar sama kvøld – men frá klokkan 18 til 19.
– Vit halda okkum hava eitt óvuliga gott tilboð til henda aldursbólkin, sum vit ætla at halda fast um. Eitt tilboð, har børnini sleppa at spæla og eksperimentera seg til vitan, uttan stívar karmar við møtiskyldu, har tey skulu undirvísast. Vit vita, at børn í hesum aldrinum læra best gjøgnum spæl, og vit síggja eisini, at børnini sjálvi søkja læringina, tá tey eru til reiðar, sigur Annika Wenningsted Jacobsen, leiðari á Dagstovninum á Hamrinum á Argjum við heimasíðuna hjá Pedagogfelagnum.
